തളിപ്പറമ്പ്: ജപ്പാന്‍ കുടിവെള്ള പദ്ധതിയുടെ പൈപ്പ് പൊട്ടി വെളളം കുത്തിയൊഴുകി റോഡില്‍ ഗര്‍ത്തം രൂപപ്പെട്ടു. തളിപ്പറമ്പ് രാജരാജേശ്വര ക്ഷേത്രത്തിനു സമീപത്തെ റെഡ്സ്റ്റാര്‍ വായനശാലക്കു മുന്നിലൂടെ കടന്നുപോകുന്ന പ്രധാന വിതരണ പൈപ്പാണ് ഇന്നലെ ഉച്ചയോടെ പൊട്ടിയത്. സമീപവാസികള്‍ ഉടന്‍ തന്നെ വിവരമറിയിച്ചെങ്കിലും വാട്ടര്‍ അതോറിറ്റി അധികൃതര്‍ മൂന്ന് മണിയൊടെയാണ് സംഭവ സ്ഥലത്തെത്തിയത്. വെള്ളം പമ്പ് ചെയ്യുന്നത് നിര്‍ത്തുമ്പോഴേക്കും ലക്ഷക്കണക്കിനു ലിറ്റര്‍ വെള്ളം നഷ്ടമായിരുന്നു. ചെളിവെള്ളമിറങ്ങി സമീപത്തുളള കിണറുകള്‍ മലിനമാകുകയും ചെയ്തു.
40 ലക്ഷം ലിറ്ററാണ് ആടിക്കംപാറയിലെ ടാങ്കിന്റെ സംഭരണശേഷി. ശക്തമായി വെളളം കുത്തിയൊലിച്ചതോടെ കണ്ടിവാതുക്കലില്‍ നിന്നും മുക്കോലയിലേക്കുള്ള റോഡ് ചെളിക്കുളമായി. പൈപ്പ് പൊട്ടിയതോടെ ആടിക്കംപാറയിലെ ജപ്പാന്‍ കുടിവെള്ള പദ്ധതിയുടെ ശുദ്ധജല സംഭരണിയില്‍ നിന്നുളള വിതരണം ഭാഗികമായി മുടങ്ങും. റോഡിന്റെ വശങ്ങളില്‍ സ്ഥാപിച്ചിട്ടുള്ള പ്രധാന പൈപ്പുകള്‍ പൊട്ടുന്നത് വെള്ളം പമ്പ് ചെയ്യുമ്പോഴുണ്ടാകുന്ന സമ്മര്‍ദം മൂലമാണെന്നാണ് അധികൃതര്‍ പറയുന്നു. പ്രധാന വിതരണ പൈപ്പായതിനാല്‍ ഉടന്‍ തന്നെ പൊട്ടിയ പൈപ്പ് നന്നാക്കുമെന്ന് അധികൃതര്‍ പറഞ്ഞു.