ഡല്‍ഹി: ശ്വാസമെടുക്കാനാവാതെ വലഞ്ഞ ഡല്‍ഹി. നഗരത്തിലെ മലിനീകരണ തോത് വര്‍ധിക്കുന്നതായാണ് റിപ്പോര്‍ട്ട്. ഇത് കണക്കിലെടുത്ത് സര്‍ക്കാര്‍ ഓഫിസുകളിലെ പകുതി ജീവനക്കാര്‍ക്ക് 'വര്‍ക്ക് ഫ്രം ഹോം' നല്‍കാന്‍ തീരുമാനിച്ചിരിക്കുകയാണ് ഡല്‍ഹി സര്‍ക്കാര്‍. ഓഫിസുകളിലെ 50 ശതമാനം ജീവനക്കാര്‍ വീടുകളിലിരുന്ന് ജോലി ചെയ്യണമെന്ന് പരിസ്ഥിതി മന്ത്രി ഗോപാല്‍ റായ് അറിയിച്ചു.

സര്‍ക്കാര്‍ ഓഫിസുകളില്‍ വര്‍ക്ക് ഫ്രം ഹോം വ്യവസ്ഥകള്‍ നടപ്പാക്കുന്നത് സംബന്ധിച്ച് ഉദ്യോഗസ്ഥരുമായി ചര്‍ച്ച നടത്തുമെന്നും അദ്ദേഹം എക്‌സില്‍ കുറിച്ചു. 

'മലിനീകരണം കുറക്കുന്നതിനായി സര്‍ക്കാര്‍ ഓഫിസുകളിലെ ജീവനക്കാര്‍ക്ക് വീട്ടിലിരുന്ന് ജോലി ചെയ്യാന്‍ നിര്‍ദേശം നല്‍കാന്‍ ഡല്‍ഹി സര്‍ക്കാര്‍ തീരുമാനിച്ചു. 50% ജീവനക്കാരും വീട്ടിലിരുന്ന് ജോലി ചെയ്യും. ഇതിന്റെ നടത്തിപ്പിനായി ഇന്ന് ഉച്ചക്ക് ഒരു മണിക്ക് സെക്രട്ടറിയറ്റില്‍ ഉദ്യോഗസ്ഥരുമായി യോഗം ചേരും' -ഗോപാല്‍ റായ് എക്‌സ് പോസ്റ്റില്‍ പറഞ്ഞു.

വായു ഗുണനിലവാരം അപകടകരമായ അവസ്ഥയില്‍ സ്‌കൂളുകളും ഡല്‍ഹി സര്‍വകലാശാലയും അടച്ചിരിക്കുകയാണ്. നവംബര്‍ 23 ശനിയാഴ്ചവരെ ക്ലാസുകള്‍ ഓണ്‍ലൈനായി നടത്തുമെന്ന് ഡല്‍ഹി സര്‍വകലാശാലയുടെ അറിയിപ്പ്.  മലിനീകരണ തോത് ഉയരുന്നതിനാല്‍ ഡല്‍ഹിയിലെ എല്ലാ സ്‌കൂളുകളിലും ഓണ്‍ലൈനില്‍ പ്രവര്‍ത്തിക്കുമെന്ന് ഡല്‍ഹി മുഖ്യമന്ത്രി അതിഷി എക്‌സില്‍ കുറിച്ചു.

ഡല്‍ഹിയില്‍ കര്‍ശനമായ നിയന്ത്രണങ്ങള്‍ നിലവിലുണ്ട്. അനുമതി വാങ്ങാതെ നിയന്ത്രണങ്ങള്‍ നീക്കരുതെന്ന് സുപ്രിംകോടതി നിര്‍ദേശിച്ചിട്ടുമുണ്ട്.