ബംഗളൂരു: കര്‍ണാടകയിലെ വിജയപുര ജില്ലയില്‍ മേല്‍ജാതിക്കാരന്റെ ബൈക്കില്‍ തൊട്ടതിന് ദലിത് യുവാവിന് ക്രൂരമര്‍ദ്ദനം. ബംഗളൂരുവില്‍ നിന്ന് 530 കിലോമീറ്റര്‍ അകലെ തളിക്കോട്ടെയില്‍ ശനിയാഴ്ചയായിരുന്നു സംഭവം. യുവാവ് അബദ്ധത്തില്‍ മേല്‍ ജാതിക്കാരന്റെ ബൈക്കില്‍ തൊട്ടതില്‍ പ്രകോപിതരായി ഒരു സംഘം യുവാവിനെയും കുടുംബത്തെയും അക്രമിക്കുകയായിരുന്നുവെന്ന് പൊലിസ് പറഞ്ഞു.ദലിത് യുവാവിനെ വടിയും ചെരിപ്പും ഉപയോഗിച്ചാണ് സംഘം മര്‍ദ്ദിച്ചത്. ഇതിന്റെ വിഡിയോയും പുറത്തുവന്നു. കൊവിഡ് നിര്‍ദേശങ്ങള്‍ പാലിക്കാത്ത അക്രമി സംഘത്തില്‍ ആരും മാസ്‌കു പോലും ധരിച്ചിട്ടില്ല. 

യുവാവിന്റെ പരാതിയില്‍ 13 പേര്‍ക്കെതിരേ എസ്.സി, എസ്.ടി നിയമപ്രകാരം കേസെടുത്തതായി സീനിയര്‍ പൊലിസ് ഓഫിസര്‍ അനുപം അഗര്‍വാള്‍ പറഞ്ഞു.