തിരുവനന്തപുരം: സ്ത്രീത്വത്തെ അപമാനിച്ചുവെന്ന് ആരോപണ വിധേയനായ മന്ത്രി എം.എം മണിക്ക് ആറംഗ വനിതാ പൊലിസിന്റെ കാവല്‍. മണിക്കെതിരേ വനിതകളുടെ പ്രതിഷേധമുണ്ടാകുമെന്ന ഇന്റലിജന്‍സ് റിപ്പോര്‍ട്ടിനെ തുടര്‍ന്നാണ് വനിതാ പൊലിസിന്റെ കാവലേര്‍പ്പെടുത്തിയത്. ഇതോടെ മുഖ്യമന്ത്രി കഴിഞ്ഞാല്‍ ഏറ്റവും കൂടുതല്‍ സുരക്ഷയുള്ള മന്ത്രിയായി മണി.
യാത്രചെയ്യുമ്പോള്‍ വനിതാ പൊലിസിന്റെ പ്രത്യേക വാഹനവും ഒപ്പമുണ്ടാകും. കാമറ ഉള്‍പ്പെടെയുള്ള ആധുനിക സജ്ജീകരണമുള്ള വാഹനത്തിലാണ് വനിതാ പൊലിസ് ഉണ്ടാകുക. മണിക്ക് എസ്‌കോര്‍ട്ടും പൈലറ്റുമായി പുരുഷ പൊലിസുകാരുമുണ്ട്.
മണി താമസിക്കുന്ന വസതിക്ക് മുന്നിലും സുരക്ഷഒരുക്കിയിട്ടുണ്ട്. മണി ഇടുക്കിയില്‍ പ്രവേശിക്കുന്നതിനു മുന്‍പ് തന്നെ ജില്ലാ പൊലിസ് മേധാവിയെ അറിയിക്കണമെന്നും ജില്ലാ പൊലിസ് മധോവിയുടെ നിര്‍ദേശമില്ലാതെ ഇടുക്കിയിലെ പരിപാടികളില്‍ പങ്കെടുക്കരുതെന്നും നിര്‍ദേശമുണ്ട്. മന്ത്രി നിയമസഭയിലേയ്ക്ക് വരുമ്പോഴും ശക്തമായ കാവലുണ്ട്.