തലശ്ശേരി: മയക്കുമരുന്നുമായി യുവാവ് പിടിയില്‍. കതിരുര്‍ വേറ്റുമ്മലിലെ ശാദുലി മന്‍സിലില്‍ ടി.കെ അനീസാ(19)ണ് ആറു ഗ്രാം മയക്കുമരുന്നുമായി കതിരൂര്‍ പൊലിസിന്റെ പിടിയിലായത്.
ഇന്നലെ വൈകിട്ട് പൊലിസ് പട്രോളിങിനിടെയാണ് കതിരൂര്‍ ഉക്കാസ്‌മൊട്ടയില്‍ വച്ച് ഇയാള്‍ പൊലിസിന്റെ വലയിലാകുന്നത്. ഓയില്‍ രൂപത്തിലും പൊടിരൂപത്തിലുമുള്ള മാരകമയക്കുമരുന്നാണ് ഇയാളില്‍ നിന്നു കണ്ടെടുത്തത്. മാളുകള്‍ കേന്ദ്രീകരിച്ച് വില്‍പ്പന നടത്തുന്നതിനിടെയാണ് ഇയാള്‍ പൊലിസിന്റെ വലയിലാകുന്നത്.
ഇതരസംസ്ഥാനങ്ങളില്‍ നിന്നു മയക്കുമരുന്ന് ശേഖരിച്ച് നാട്ടില്‍ വില്‍പ്പന നടത്തുന്നതില്‍ പ്രധാനിയാണ് അനീസെന്ന് പൊലിസ് പറഞ്ഞു. ഒരുഗ്രാമിന് നാലായിരം രൂപ വരെ വില വരും. സംഘത്തിലെ മറ്റുള്ളവരെ കുറിച്ച് പൊലിസിന് വിവരം ലഭിച്ചിട്ടുണ്ട്.  എ.എസ്.പി അരവിന്ദ്‌സുകുമാറിന് ലഭിച്ച രഹസ്യവിവരത്തിന്റെ അടിസ്ഥനാത്തില്‍ നടത്തിയ പരിശോധനയിലാണ് ഇയാള്‍ പിടിയിലാകുന്നത്.