ന്യൂയോര്‍ക്ക്: അധിനിവിഷ്ട വെസ്റ്റ് ബാങ്കില്‍ ഇസ്‌റാഈല്‍ നടത്തുന്ന ഏകപക്ഷീയമായ നടപടികളെയും നിയമവിരുദ്ധമായ കൈയേറ്റം വ്യാപിപ്പിക്കാനുള്ള നീക്കങ്ങളെയും അപലപിച്ച് ഇന്ത്യ. ഐക്യരാഷ്ട്രസഭയിലെ 100ലധികം രാജ്യങ്ങളും ആഗോള സംഘടനകളും സംയുക്തമായി പുറപ്പെടുവിച്ച പ്രസ്താവനയില്‍ ഇന്ത്യയും ഒപ്പുവച്ചു. ഫലസ്തീന്‍ യു.എന്‍ മിഷന്‍ പുറത്തുവിട്ട സംയുക്ത പ്രസ്താവനയില്‍ ഇസ്‌റാഈലിന്റെ നടപടികള്‍ അന്താരാഷ്ട്ര നിയമങ്ങളുടെ ലംഘനമാണെന്ന് ചൂണ്ടിക്കാട്ടുന്നു. വെസ്റ്റ് ബാങ്കിലെ ഇസ്‌റാഈലിന്റെ നിയമവിരുദ്ധ സാന്നിധ്യം വിപുലീകരിക്കാന്‍ ലക്ഷ്യമിട്ടുള്ള ഏകപക്ഷീയമായ തീരുമാനങ്ങളെ ശക്തമായി അപലപിക്കുവെന്നും ഇത്തരം നടപടികള്‍ ഇസ്‌റാഈല്‍ ഉടന്‍ പിന്‍വലിക്കണമെന്നും പ്രസ്താവനയില്‍ രാജ്യങ്ങള്‍ ആവശ്യപ്പെട്ടു.
ചൊവ്വാഴ്ച ആദ്യം 85 രാജ്യങ്ങള്‍ ചേര്‍ന്ന് പുറപ്പെടുവിച്ച പ്രസ്താവനയില്‍ ഇന്ത്യ ഉള്‍പ്പെട്ടിരുന്നില്ല. ഇത് ഇന്ത്യയിലും ആഗോളതലത്തിലും വിവാദത്തിനിടയാക്കിയിരുന്നു. എന്നാല്‍, പിന്നീട് നൂറിലധികം രാജ്യങ്ങളായി ഈ പട്ടിക ഉയര്‍ന്നപ്പോള്‍ ഇന്ത്യയും ഇതില്‍ പങ്കാളിയാവുകയായിരുന്നു.
1967 മുതല്‍ ഇസ്‌റാഈല്‍ കൈവശപ്പെടുത്തിയ കിഴക്കന്‍ ജറുസലേം ഉള്‍പ്പെടെയുള്ള ഫലസ്തീന്‍ പ്രദേശങ്ങളുടെ സ്വഭാവത്തിലോ ജനസംഖ്യാപരമായ ഘടനയിലോ മാറ്റം വരുത്താനുള്ള ഏതൊരു നീക്കത്തെയും സംയുക്ത പ്രസ്താവന തള്ളിക്കളഞ്ഞു. മേഖലയില്‍ സമാധാനം പുനഃസ്ഥാപിക്കാന്‍ ദ്വിരാഷ്ട്ര പരിഹാരം മാത്രമാണ് ഏക പോംവഴിയെന്ന് പ്രസ്താവന ആവര്‍ത്തിച്ചു. 
യൂറോപ്യന്‍ യൂനിയന്‍, അറബ് ലീഗ്, ഒ.ഐ.സി എന്നീ സംഘടനകളും ചൈന, റഷ്യ, ബ്രിട്ടന്‍, ഫ്രാന്‍സ്, ജര്‍മ്മനി, ജപ്പാന്‍, ഓസ്‌ട്രേലിയ, കാനഡ, സഊദി അറേബ്യ, യു.എ.ഇ, ഖത്തര്‍, ഈജിപ്ത്, ജോര്‍ദാന്‍, തുര്‍ക്കി, ബ്രസീല്‍, ബെല്‍ജിയം, ബോസ്‌നിയ, കാനഡ, കൊളംബിയ, ഫിന്‍ലാന്‍ഡ്, ഫ്രാന്‍സ്, ജര്‍മനി, ഗ്രീസ്, ഇറ്റലി,ന്യൂസിലാന്‍ഡ്, നോര്‍വെ, സ്വിറ്റ്‌സര്‍ലന്‍ഡ്, സ്‌പെയിന്‍, ശ്രീലങ്ക, സ്വീഡന്‍, ദക്ഷിണാഫ്രിക്ക എന്നീ രാഷ്ട്രങ്ങളും സംയുക്ത പ്രസ്താവനയില്‍ ഒപ്പുവച്ചിട്ടുണ്ട്.
സ്വതന്ത്രവും പരമാധികാരമുള്ളതുമായ ഫലസ്തീന്‍ രാഷ്ട്രമെന്ന നിലപാടിനെ ഇന്ത്യ എക്കാലത്തും പിന്തുണച്ചിട്ടുണ്ട്. 1988ല്‍ ഫലസ്തീന്‍ രാഷ്ട്രത്തെ അംഗീകരിച്ച ആദ്യ അറബ് ഇതര രാജ്യമാണ് ഇന്ത്യ. 

Summary: : In a significant diplomatic move, India has joined over 100 countries and major global organizations in signing a joint statement issued at the United Nations, condemning Israel's unilateral actions and the expansion of illegal settlements in the occupied West Bank