കണ്ണൂര്‍: ഫ്രാന്‍സിന്റെ ദേശിയ ദിനാഘോഷത്തിന്റെ അലകള്‍ അടങ്ങും മുമ്പേ മാഹിയില്‍ ഫ്രഞ്ച് ജനതയ്ക്ക് ആഘോഷിക്കാന്‍ ലോകകപ്പ് ഫുട്‌ബോള്‍ വിജയംകൂടി.
ഫ്രഞ്ച് പൗരന്മാരുടെ മാഹിയിലെ സംഘടനാ കാര്യാലയമായ യൂ ന്യോം ദെ ഫ്രാന്‍സെദില്‍ ഒത്തുകൂടിയ ഫ്രഞ്ച് പൗരന്മാരും ഫ്രാന്‍സ് ടീമിന്റെ ആരാധകരായ തദ്ദേശവാസികളും പടക്കംപൊട്ടിച്ചും ആര്‍പ്പുവിളിച്ചും സ്വന്തം ടീമിന്റെ സുവര്‍ണ നേട്ടത്തില്‍ ആഹ്ലാദിച്ചു. ഫ്രാന്‍സിന്റെ രണ്ടാം ഗോളില്‍ തന്നെ കിരീടം ഫ്രാന്‍സിനു തന്നെയെന്ന് മാഹിക്കാര്‍ ഉറപ്പിച്ചിരുന്നു.
തുടരെത്തുടരെ നാല് ഗോളുകള്‍ ക്രൊയേഷ്യന്‍ വലയില്‍ വീണതോടെ മാഹിയില്‍ ആഹ്ലാദം അണപൊട്ടിയൊഴുകി. ഫ്രഞ്ച് പതാകയുമായാണ് ആരാധകര്‍ മാഹിയില്‍ പ്രകടനം നടത്തിയത്.