ദുബൈ: യുഎഇയില്‍ കനത്ത വേനല്‍ച്ചൂട് തുടരുമെന്ന് ദേശീയ കാലാവസ്ഥാ കേന്ദ്രം (എന്‍സിഎം) മുന്നറിയിപ്പ് നല്‍കി. ഇന്ന് രാജ്യത്തിന്റെ ഉള്‍പ്രദേശങ്ങളില്‍ താപനില 49 ഡിഗ്രി സെല്‍ഷ്യസ് വരെ ഉയരാനാണ് സാധ്യത. അതേസമയം, ചില പ്രദേശങ്ങളില്‍ പൊടിക്കാറ്റും ദൂരക്കാഴ്ച കുറയാനും സാധ്യതയുണ്ടെന്ന് അധികൃതര്‍ അറിയിച്ചു.
ഇന്ന് പൊതുവെ തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയായിരിക്കും. പ്രത്യേകിച്ച് കിഴക്കന്‍, വടക്കന്‍ മേഖലകളില്‍ ഇടയ്ക്കിടെ മേഘസാന്നിധ്യം അനുഭവപ്പെടും.

തീരപ്രദേശങ്ങളിലും ദ്വീപുകളിലും 39 മുതല്‍ 44 ഡിഗ്രി സെല്‍ഷ്യസ് വരെയും ഉള്‍പ്രദേശങ്ങളില്‍ 44 മുതല്‍ 49 ഡിഗ്രി സെല്‍ഷ്യസ് വരെയും പര്‍വത മേഖലകളില്‍ 33 മുതല്‍ 38 ഡിഗ്രി സെല്‍ഷ്യസ് വരെയും താപനില രേഖപ്പെടുത്തുമെന്നാണ് പ്രവചനം.

മണിക്കൂറില്‍ 10 മുതല്‍ 25 കിലോമീറ്റര്‍ വരെ വേഗത്തില്‍ തെക്കുപടിഞ്ഞാറന്‍ മുതല്‍ വടക്കുപടിഞ്ഞാറന്‍ ദിശയിലേക്കുള്ള കാറ്റ് വീശും. ചില സമയങ്ങളില്‍ കാറ്റിന്റെ വേഗം 40 കിലോമീറ്റര്‍ വരെ ഉയരാന്‍ സാധ്യതയുള്ളതിനാല്‍ തുറന്ന പ്രദേശങ്ങളില്‍ പൊടിക്കാറ്റ് രൂപപ്പെടുകയും ദൂരക്കാഴ്ച കുറയുകയും ചെയ്യാം.

അറേബ്യന്‍ ഗള്‍ഫില്‍ കടല്‍ നേരിയതോ മിതമായതോ ആയിരിക്കും. ഒമാന്‍ കടലില്‍ പൊതുവെ നേരിയ തിരമാലകളാണ് പ്രതീക്ഷിക്കുന്നത്.

വരും ദിവസങ്ങളിലും സമാനമായ കാലാവസ്ഥ തുടരുമെന്നാണ് കാലാവസ്ഥാ കേന്ദ്രത്തിന്റെ പ്രവചനം. വ്യാഴം, വെള്ളി ദിവസങ്ങളില്‍ കാറ്റിന്റെ വേഗം മണിക്കൂറില്‍ 10 മുതല്‍ 20 കിലോമീറ്റര്‍ വരെ ആയിരിക്കുമെങ്കിലും, ശനിയാഴ്ച വീണ്ടും ശക്തിപ്രാപിച്ച് 35 കിലോമീറ്റര്‍ വരെ എത്താന്‍ സാധ്യതയുണ്ട്.

താപനിലയില്‍ കാര്യമായ കുറവ് പ്രതീക്ഷിക്കേണ്ടതില്ലെന്നും രാജ്യത്തിന്റെ ഭൂരിഭാഗം പ്രദേശങ്ങളിലും ചൂടും ഈര്‍പ്പവും കൂടിയ വേനല്‍ക്കാല സാഹചര്യം തുടരുമെന്നും കാലാവസ്ഥാ കേന്ദ്രം അറിയിച്ചു.

English Summary:  Temperatures across the UAE are set to climb as high as 49C inland on Wednesday, while fresh winds are expected to kick up blowing dust in exposed areas, according to the National Centre of Meteorology.