പയ്യന്നൂര്‍: ചരിത്രവും പാരമ്പര്യവും മുറുകെ പിടിച്ച് പയ്യന്നൂരില്‍ ശാശ്വത സമാധാനത്തിന് എല്ലാ രാഷ്ട്രീയ കക്ഷികളും തയ്യാറാകണമെന്ന് മുന്‍മന്ത്രി കെ.പി മോഹനന്‍.
അക്രമത്തിനും കൊലപാതകത്തിനുമെതിരെ സമാധാന സന്ദേശവുമായി ജനതാദള്‍ എസ് മണ്ഡലം കമ്മറ്റി ഗാന്ധിപാര്‍ക്കില്‍ സംഘടിപ്പിച്ച ഏകദിന ഉപവാസം ഉദ്ഘാടനം ചെയ്യുകയായിരുന്നു അദ്ദേഹം.
അക്രമവും കൊലപാതകവും നടത്തുന്ന കക്ഷികള്‍ ജനങ്ങളില്‍ നിന്നും ഒറ്റപ്പെടും. സ്‌നേഹവും സാഹോദര്യവും വളര്‍ത്താനാണ് രാഷ്ട്രീയ പാര്‍ട്ടികള്‍ ശ്രമിക്കേണ്ടതെന്നും കെ.പി മോഹനന്‍ പറഞ്ഞു.
വി.കെ കുഞ്ഞിരാമന്‍ അധ്യക്ഷനായി. സംസ്ഥാന വൈസ് പ്രസിഡന്റ് പി കോരന്‍, കെ.പി ചന്ദ്രന്‍, കെ വത്സരാജ്, പി.വി ദാസന്‍, കെ.കെ ബാലകൃഷ്ണന്‍ സംസാരിച്ചു. വൈകുന്നേരം സ്വാതന്ത്ര്യ സമര സേനാനി കെ.എന്‍ കണ്ണോത്ത് നാരങ്ങാനീര് നല്‍കി ഉപവാസം അവസാനിപ്പിച്ചു.