സ്‌കോപ്‌ജെ: മാസിഡോണിയന്‍ പാര്‍ലമെന്റിലുണ്ടായ സംഘര്‍ഷത്തില്‍ 100ലേറെ പേര്‍ക്ക് പരുക്കേറ്റു. പ്രക്ഷോഭകര്‍ പാര്‍ലമെന്റിലേക്ക് ഇരച്ചുകയറി എം.പിമാരെ കൈയേറ്റം ചെയ്യുകയായിരുന്നുവെന്ന് ആഭ്യന്തര മന്ത്രാലയം വ്യക്തമാക്കി.
പുതിയ സ്പീക്കറെ തെരഞ്ഞെടുക്കാനാണ് ഇന്നലെ പാര്‍ലമെന്റ് ചേര്‍ന്നത്. പ്രക്ഷോഭകരില്‍ ഏറെയും മുഖം മറച്ചാണ് എത്തിയത്. പാര്‍ലമെന്റിനു പുറത്ത് കനത്ത പൊലിസ് സന്നാഹവും കവചിത വാഹനങ്ങളും ഏര്‍പ്പെടുത്തിയിരുന്നുവെങ്കിലും ഫലം കണ്ടില്ല.
102 പേര്‍ ആശുപത്രിയില്‍ ചികിത്സ തേടിയതായി ആഭ്യന്തര മന്ത്രാലയം പ്രസ്താവനയില്‍ പറഞ്ഞു. എം.പിമാരും പൊലിസുകാരും ഇതില്‍ ഉള്‍പ്പെടും.
ദേശീയഗാനം ആലപിച്ച്, ദേശീയ പതാകയുമായെത്തിയ പ്രക്ഷോഭകര്‍ പാര്‍ലമെന്റിലെ സുരക്ഷാ ജീവനക്കാരെ കൈയേറ്റം ചെയ്തു. തുടര്‍ന്ന് പാര്‍ലമെന്റ് ഹാളിലെത്തി എം.പിമാരെ തല്ലി. പ്രതിപക്ഷ നേതാവും സോഷ്യല്‍ ഡെമോക്രാറ്റ്‌സ് (എസ്.ഡി.എസ്.എം) പ്രതിനിധിയുമായ സൊറാന്‍ സയേവിന്റെ മൂക്കിനും മുഖത്തും പരുക്കേറ്റു. പാര്‍ലമെന്റ് പ്രസ് റൂമിലെ കസേരകള്‍ പ്രതിഷേധക്കാര്‍ വലിച്ചെറിഞ്ഞു. ബാല്‍ക്കണിയില്‍ നിന്ന് വനിതാ എം.പിമാര്‍ അടക്കം ചാടി രക്ഷപ്പെടാനും ശ്രമിച്ചു.
10 എം.പിമാര്‍ക്കും നിരവധി മാധ്യമപ്രവര്‍ത്തകര്‍ക്കും പരുക്കേറ്റതായി ആഭ്യന്തര മന്ത്രി അഗിം നുഹിയു പറഞ്ഞു. സ്ഥിതി നിയന്ത്രണ വിധേയമായതായി പൊലിസ് അറിയിച്ചു.