കേളകം (കണ്ണൂര്‍): തെരഞ്ഞെടുപ്പ് പ്രചാരണ പരസ്യചിത്രത്തില്‍ സ്ത്രീവിരുദ്ധത ആരോപിച്ച് തനിക്കെതിരെ വനിതാ കമ്മിഷന്‍ കേസെടുത്തതു തികച്ചും രാഷ്ട്രീയ പ്രേരിതമാണെന്നു യു.ഡി.എഫ് സ്ഥാനാര്‍ഥി കെ. സുധാകരന്‍. തന്റെ തെരഞ്ഞെടുപ്പ് പ്രചാരണാര്‍ഥമുള്ള ഫേസ്ബുക്ക് വിഡിയോയില്‍ സ്ത്രീ വിരുദ്ധമായ യാതൊരു പരാമര്‍ശങ്ങളുമില്ല. വനിതാ കമ്മിഷന്റെ രാഷ്ട്രീയം കോടതിയില്‍ തുറന്നുകാട്ടും.

ക്രിമിനല്‍ കേസെടുക്കാനുള്ള യാതൊരു പരാമര്‍ശവും അതിലില്ലെന്നാണു തന്റെ നിയമബോധം പറയുന്നത്. ഡി.വൈ.എഫ്.ഐ വനിതയെ പീഡിപ്പിച്ച കേസില്‍ പി.കെ ശശി എം.എല്‍.എക്കും ആലത്തൂര്‍ മണ്ഡലം യു.ഡി.എഫ് സ്ഥാനാര്‍ഥി രമ്യാ ഹരിദാസിനെതിരെ മോശമായ പരാമര്‍ശം നടത്തിയ എല്‍.ഡി.എഫ് കണ്‍വീനര്‍ എ. വിജയരാഘവനെതിരെയും യാതൊരു നടപടിയും സ്വീകരിക്കാത്ത വനിതാ കമ്മിഷന്‍ തനിക്കെതിരെ കേസെടുത്തതിലൂടെ ഇങ്ങനെ ഒരു വനിതാ കമ്മിഷന്‍ നിലവിലുണ്ടെന്നു തെളിഞ്ഞു. ഇതു സി.പി.എമ്മിന്റെ വനിതാ കമ്മിഷനാണ്.

വിഡിയോയിലെ അവള്‍ എന്ന പരാമര്‍ശം ഒരിക്കലും സ്ത്രീ വിരുദ്ധമല്ല. കണ്ണൂരിലെ പ്രാദേശിക ഭാഷയായി അവള്‍ എന്ന വാക്ക് ഉപയോഗിക്കാറുണ്ട്. ഒരു സ്ത്രീയെക്കുറിച്ച് അവള്‍ എന്നു പരാമര്‍ശിച്ചാല്‍ അത് ആ സ്ത്രീക്ക് മാത്രമാണു ബാധകമെന്നും സുധാകരന്‍ മാധ്യമപ്രവര്‍ത്തകരോടു പറഞ്ഞു.