ജയ്പൂര്‍: രാജസ്ഥാന്‍ പ്രതിസന്ധി അവസാനിച്ചെന്ന കോണ്‍ഗ്രസ് പ്രഖ്യാപനം മൂന്ന് ദിവസം പിന്നിടവെ, മുഖ്യമന്ത്രി അശോക് ഗെലോട്ടും വിമത ശബ്ദമുയര്‍ത്തിയ സച്ചിന്‍ പൈലറ്റും ഇന്ന് മുഖാമുഖം കാണും. കോണ്‍ഗ്രസ് നിയമസഭാ കക്ഷി യോഗത്തില്‍ ഇരുവരും പങ്കെടുക്കുമെന്നാണ് റിപ്പോര്‍ട്ടുകള്‍. വെള്ളിയാഴ്ച നിര്‍ണായക നിയമസഭാ സമ്മേളം നടക്കാനിരിക്കെയാണ് യോഗം.

മാസങ്ങള്‍ക്ക് ശേഷമാണ് ഇരുവരും തമ്മില്‍ കാണുന്നത്. കോണ്‍ഗ്രസ് നേതാക്കളായ രാഹുല്‍ ഗാന്ധിയുമായും പ്രിയങ്ക ഗാന്ധിയുമായും നടത്തിയ അനുരഞ്ജന ചര്‍ച്ചകള്‍ക്കൊടുവില്‍ പൈലറ്റും സംഘവും ജയ്പൂരില്‍ കഴിഞ്ഞ ദിവസം തിരിച്ചെത്തിയിരുന്നു. വിശ്വാസ വോട്ടെടുപ്പിലേക്ക് കടക്കാനുള്ള ഗെലോട്ട് ക്യാംപിന്റെ നീക്കത്തിനിടെയായിരുന്നു പൈലറ്റിന്റെ നിര്‍ണായക തീരുമാനം.

സച്ചിന്‍ പൈലറ്റ് ഉന്നയിച്ച പരാതികള്‍ പരിശോധിക്കാന്‍ പ്രിയങ്ക ഗാന്ധി അടക്കമുള്ള മൂന്നംഗ സമിതിയെ കോണ്‍ഗ്രസ് ചുമതലപ്പെടുത്തിയിട്ടുണ്ട്. പൈലറ്റ് ഉന്നയിച്ച പരാതികളില്‍ ഉടന്‍ തന്നെ തീരുമാനമുണ്ടാക്കുമെന്ന് അശോക് ഗെലോട്ട് ഉറപ്പും നല്‍കിയിട്ടുണ്ട്.

വ്യക്തിപരമായി ഒരു പ്രശ്‌നവും നടന്നിട്ടില്ലെന്നും ഭരണം സംബന്ധിച്ച് മാത്രമാണ് നടന്നതൊക്കെയെന്നുമാണ് പൈലറ്റിന്റെ പ്രതികരണം. മുഖ്യമന്ത്രി എന്ന നിലയില്‍ അദ്ദേഹം മാറ്റം വരുത്തേണ്ട കാര്യങ്ങള്‍ ഉണ്ടെന്ന് തോന്നിയാല്‍ അത് പറയാനുള്ള അവകാശം തനിക്കുണ്ടെന്നും സച്ചിന്‍ പറഞ്ഞു. അത് പാര്‍ട്ടി വിരുദ്ധമോ, ദേശ വിരുദ്ധമോ ജനാധിപത്യ വിരുദ്ധമോ അല്ല എന്നും സച്ചിന്‍ കൂട്ടിച്ചേര്‍ത്തു.