മലപ്പുറം: മത്സ്യബന്ധന മേഖലയുടെ സമഗ്ര വികസനത്തിനായുള്ള ഇന്റഗ്രേറ്റഡ് ഫിഷറീസ് ഡവലപ്‌മെന്റ് പ്രൊജക്ടി(ഐ.എഫ്.ഡി.പി)നു ഭരണാനുമതിയായി. ദേശീയ സഹകരണ വികസന കോര്‍പറേഷ(എന്‍.സി.ഡി.സി)ന്റെ സഹകരണത്തോടെ 4504.80 ലക്ഷം രൂപ ചെലവില്‍ മത്സ്യഫെഡ് നടപ്പാക്കുന്ന പദ്ധതിയാണിത്.
മത്സ്യത്തൊഴിലാളികളുടെ വരുമാനം വര്‍ധിപ്പിക്കാന്‍ ഉദ്ദേശിച്ചുകൊണ്ടുള്ള പദ്ധതിയാണിത്. പരമ്പരാഗത മത്സ്യത്തൊഴിലാളികള്‍ക്കു മത്സ്യം ലേലത്തിനെടുത്ത് വിപണനം ചെയ്യാനുള്ള ശേഷി വര്‍ധിപ്പിച്ച് മത്സ്യത്തിനു മെച്ചപ്പെട്ട വില ലഭിക്കാന്‍ സാഹചര്യമൊരുക്കുക, പദ്ധതിയില്‍ അംഗങ്ങളാകുന്ന മത്സ്യത്തൊഴിലാളികള്‍ക്ക് മത്സ്യത്തിനു മെച്ചപ്പെട്ട വില ലഭിക്കുന്ന തരത്തില്‍ മാര്‍ക്കറ്റിങ് സംവിധാനമുണ്ടാക്കുക, പ്രാദേശിക പണമിടപാടുകാരില്‍നിന്ന് കടം വാങ്ങി മത്സ്യത്തൊഴിലാളികള്‍ക്കു സാമ്പത്തിക ബാധ്യത ഉണ്ടാക്കുന്നത് ഒഴിവാക്കുക, സാമൂഹ്യ വിഷയങ്ങളില്‍ പങ്കാളികളാകുന്നതിനു മത്സ്യത്തൊഴിലാളികളെ ബോധവല്‍ക്കരിക്കുക, മത്സ്യം ശേഖരിച്ചു വിതരണം ചെയ്യുന്ന പ്രാഥമിക സഹകരണ സംഘങ്ങളെ ശക്തിപ്പെടുത്തി അവയെ സ്വയംപര്യാപ്തമാക്കുക തുടങ്ങിയ ലക്ഷ്യങ്ങളും പദ്ധതിക്കുണ്ട്.
ഒമ്പതു കടല്‍ മത്സ്യബന്ധന ജില്ലകളിലും ഒരു ഉള്‍നാടന്‍ മത്സ്യബന്ധന ജില്ലയിലുമായി മത്സ്യത്തൊഴിലാളികളുടെ പ്രാഥമിക സഹകരണ സംഘങ്ങള്‍ വഴിയായിരിക്കും പദ്ധതി നടപ്പാക്കുക. ഫിഷറീസ് ഡയരക്ടറുടെ മേല്‍നോട്ടത്തില്‍ നടപ്പാക്കുന്ന പദ്ധതിയുടെ കാലാവധി ഒരു വര്‍ഷമായിരിക്കും. ഏതാണ്ട് 20,000 മത്സ്യത്തൊഴിലാളികള്‍ക്കു പദ്ധതിയുടെ നേരിട്ടുള്ള പ്രയോജനം ലഭിക്കും.