ആംസ്റ്റര്‍ഡാം: ചാംപ്യന്‍സ് ലീഗില്‍ അത്ഭുത പ്രകടനങ്ങള്‍ നടത്തുന്ന അയാക്‌സിന് കിരീടം. ഏറെ നാളത്തെ കാത്തിരിപ്പിനൊടുവില്‍ ഡച്ച് കപ്പിലാണ് അയാക്‌സ് മുത്തമിട്ടത്. കഴിഞ്ഞ ദിവസം നടന്ന ഫൈനലില്‍ വില്ലെം ക്ലബിനെ തോല്‍പ്പിച്ചായിരുന്നു അയാക്‌സിന്റെ കിരീട നേട്ടം. എതിരില്ലാത്ത നാലു ഗോളുകള്‍ക്കായിരുന്നു അയാക്‌സിന്റെ വിജയം. ഹണ്ട്‌ളറുടെ ഇരട്ട ഗോളുകളും, ബ്ലിന്‍ഡ്, ക്രിസ്റ്റന്‍സന്‍ എന്നിവരുടെ ഗോളുകളുമാണ് അയാക്‌സിന് വിജയം നല്‍കിയത്.
2009-10 സീസണ് ശേഷം ആദ്യമായാണ് അയാക്‌സ് ഡച്ച് കപ്പ് നേടുന്നത്. ഈ കിരീടത്തോടെ മൂന്ന് കിരീടങ്ങളും നേടാമെന്ന അയാക്‌സിന്റെ സ്വപ്നം സജീവമായി. ഡച്ച് ലീഗിലും അയാക്‌സ് കിരീടത്തിനടുത്താണ്. ഡച്ച് ലീഗില്‍ ര@ണ്ട് മത്സരങ്ങള്‍ മാത്രം ശേഷിക്കെ പി.എസ്.വിയെ ഗോള്‍ വ്യത്യാസത്തില്‍ പിന്തള്ളി ഒന്നാമത് നില്‍ക്കുകയാണ് അയാക്‌സ്. കൂടാതെ ചാംപ്യന്‍സ് ലീഗ് സെമിയല്‍ ആദ്യ പാദത്തില്‍ ടോട്ടനവുമായി ജയിച്ച് നില്‍ക്കുന്ന അയാക്‌സ് ഫൈനലില്‍ പ്രവേശിക്കാമെന്ന പ്രതീക്ഷയിലാണ്. നാളയാണ് അയാക്‌സും ടോട്ടനവും തമ്മിലുള്ള രണ്ടാം പാദ സെമി അരങ്ങേറുന്നത്.