വിശാഖപട്ടണം: ഡല്‍ഹി കാപിറ്റല്‍സും ചെന്നൈ സൂപ്പര്‍ കിങ്‌സും തമ്മില്‍ ഇന്ന് മൂന്നാം പ്ലേഓഫ്. രണ്ടും ഐ.പി.എല്ലിലെ തലയെടുപ്പുള്ള ടീമുകളായതിനാല്‍ ഇന്ന് മികച്ചൊരു മത്സരം തന്നെ പ്രതീക്ഷിക്കാം. ടുര്‍ണമെന്റിലുടനീളം മികച്ച പ്രകടനം നടത്തിയ ചെന്നൈ അവസാനം പരാജയപ്പെടുകയായിരുന്നു. ആദ്യ ക്വാളിഫയറില്‍ മുംബൈ ഇന്ത്യന്‍സിനോട് ആറ് വിക്കറ്റിനായിരുന്നു ചെന്നൈ പരാജയപ്പെട്ടത്. കരുത്തുറ്റ ചെന്നൈ ബാറ്റിങ്‌നിര പൂര്‍ണ പരാജയമായതായിരുന്നു പരാജയ കാരണം.
ഒരു പക്ഷെ ചെന്നൈ ഇന്ന് ജയം സ്വന്തമാക്കിയാല്‍ ഫൈനലില്‍ മുംബൈയെ നേരിടേണ്ടി വരും ചെന്നൈക്ക്. രണ്ടാം പ്ലേഓഫില്‍ നാടകീയ നീക്കങ്ങള്‍ക്കൊടുവിലായിരുന്നു ഡല്‍ഹി ഹൈദരാബാദിനെ പരാജയപ്പെടുത്തിയത്. ഒരു പന്ത് ശേഷിക്കെ വിജയറണ്‍ കണ്ടെത്തിയായിരുന്നു ഡല്‍ഹി രണ്ടാം ക്വാളിഫയറിലേക്ക് യോഗ്യത നേടിയത്. മികച്ച ഫോമിലുള്ള ഋഷഭ് പന്തിന്റെ കരുത്തിലായിരുന്നു ഡല്‍ഹിയുടെ ജയം.

ഓപ്പണര്‍ പ്വിഥി ഷയും മികച്ച പിന്തുണ നല്‍കിയിരുന്നു. ഇന്നത്തെ മത്സരത്തില്‍ ചെന്നൈക്ക് പ്വിഥ്വിഷാ, ഋഷഭ് പന്ത് എന്നിവരെ പിടിച്ച് കെട്ടിയാല്‍ മാത്രമേ വിജയത്തെ കുറിച്ച് ആലോചിക്കേണ്ടതുള്ളു. അവസാന മത്സരത്തിലെ തോല്‍വിയില്‍ പാഠം ഉള്‍ക്കൊണ്ടാണ് ചെന്നൈ ഇന്നിറങ്ങുന്നത്. ഡുപ്ലസി, വാട്‌സണ്‍, റെയ്‌ന എന്നിവര്‍ പൂര്‍ണ പരാജയമായിരുന്നു.
ധോണിയും അമ്പാട്ടി റായുഡുവും ചേര്‍ന്നായിരുന്നു ടീമിനെ അല്‍പമെങ്കിലും മെച്ചപ്പെട്ട നിലയിലെത്തിച്ചത്. ഏറ്റവും മികച്ച നിരയുള്ള ടീമുകളായതിനാല്‍ ഇന്നത്തെ മത്സരം പ്രവചനാതീതമായിരിക്കും.