തൊടുപുഴ: കഴിഞ്ഞ ജൂണ്‍ 20ന് കരിങ്കുന്നം കുഴിമറ്റം ഭാഗത്ത് റോഡ് സൈഡില്‍ പാര്‍ക്ക് ചെയ്തിരുന്ന ബൊലേറോ പിക്ക് അപ് വാന്‍ മോഷണം നടത്തിയ കേസില്‍ മുന്‍ സി ആര്‍ പി എഫുകാരന്‍ അറസ്റ്റില്‍. പത്തനംതിട്ട കോന്നി മലയാലപ്പുഴ താഴുംകരയില്‍ പുതുമന വടക്കേക്കര വീട്ടില്‍   എസ്.എസ് പിള്ള എന്നുവിളിക്കുന്ന ശിവശങ്കരപിള്ള (65) യാണ്  അറസ്റ്റിലായത്.  തൊടുപുഴ പൊലിസ് സര്‍ക്കിള്‍ ഇന്‍സ്‌പെക്ടര്‍ എന്‍.ജി. ശ്രീമോന്റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.
സി സി ഉള്ള വാഹനങ്ങള്‍ സി സി നിലനിര്‍ത്തി വാങ്ങി പൊളിച്ച് വില്‍പന നടത്തുന്ന സംഘത്തിലെ പ്രധാന കണ്ണിയാണ്  ഇയാള്‍.   ഈ കേസില്‍ സണ്ണി, ബിഞ്ചുമോന്‍ എന്നിവരെ നേരത്തെ അറസ്റ്റ് ചെയ്തിരുന്നു. പിള്ള നിരവധി വാഹന തട്ടിപ്പുകേസുകളില്‍ പ്രതിയാണ്.  തൊടുപുഴ കെ.എസ്.ആര്‍.ടി.സി ഭാഗത്ത് നിന്നാണ് പ്രതിയെ പൊലിസ് പിടികൂടിയത്.  ഇയാള്‍ക്കതിരെ പീരുമേട് സ്റ്റേഷനില്‍ മോഷണ വാഹനം പൊളിച്ചുവിറ്റതിന് കേസുണ്ട്. മോഷണം നടത്തുന്ന വാഹനങ്ങള്‍ പിള്ള മുഖാന്തിരമാണ് തമിഴ്‌നാട്ടില്‍ വില്‍പന നടത്തിയിരുന്നത്.
അന്വേഷണ സംഘത്തില്‍ കരിങ്കുന്നം എസ് ഐ ക്ലീറ്റസ് കെ ജോസഫ്, അഡിഷണല്‍ എസ്.ഐ സി.പി രാജു, തൊടുപുഴ ഡിവൈ.എസ്.പിയുടെ  ഷാഡോ പൊലിസ് സബ് ഇന്‍സ്‌പെക്ടര്‍ ടി.ആര്‍ രാജന്‍, എ.എസ്.ഐ അശോകന്‍, സീനിയര്‍ സിവില്‍ പൊലിസ്  ഓഫിസര്‍മാരായ അരുണ്‍, ഉണ്ണികൃഷ്ണന്‍, ഷാനവാസ്, കാളിയാര്‍ സി.ഐയുടെ സക്വാഡിലെ ദീപു ബാലന്‍, ഉബൈസ്. ഷംസ് എന്നിവരും ഉണ്ടായിരുന്നു.