ലണ്ടന്‍: പി.എഫ്.എ അവാര്‍ഡിന് പിന്നാലെ മറ്റൊരു പുരസ്‌കാരം കൂടി ലിവര്‍പൂള്‍ വന്‍മതില്‍ വാന്‍ഡികിനെ തേടിയെത്തി.
ഇംഗ്ലീഷ് പ്രീമിയര്‍ ലീഗിന്റെ സീസണിലെ മികച്ച താരമെന്ന നേട്ടമാണ് വാന്‍ഡിക് സ്വന്തമാക്കിയത്. പ്രീമിയര്‍ ലീഗില്‍ ലിവര്‍പൂളിന് വേ@ണ്ടി പുറത്തെടുത്ത മികച്ച പ്രകടനമാണ് വാന്‍ഡികിനെ അവാര്‍ഡിന് അര്‍ഹനാക്കിയത്.
ലിവര്‍പൂള്‍ താരങ്ങളായ മുഹമ്മദ് സലാഹ്, സാദിയോ മാനെ, മാഞ്ചസ്റ്റര്‍ സിറ്റി താരങ്ങളായ ബെര്‍ണാര്‍ഡോ സില്‍വ, റഹീം സ്റ്റെര്‍ലിങ്, സെര്‍ജിയോ അഗ്വേറൊ, ചെല്‍സി താരം ഏദന്‍ ഹസാര്‍ഡ് എന്നിവരെ പിന്തള്ളിയാണ് വാന്‍ഡിക് അവാര്‍ഡ് സ്വന്തമാക്കിയത്.
2018 ജനുവരിയിലായിരുന്നു റെക്കോര്‍ഡ് തുകക്ക് വാന്‍ഡിക് സതാംപ്ടണില്‍ നിന്ന് ലിവര്‍പൂളില്‍ എത്തുന്നത്. വാന്‍ഡികിന്റെ മികവിലായിരുന്നു ലിവര്‍പൂള്‍ ചാംപ്യന്‍സ് ലീഗിന്റെ ഫൈനലില്‍ പ്രവേശിച്ചത്.

പ്രീമിയര്‍ ലീഗ് സീസണില്‍ നാല് ഗോളുകളും താരം നേടിയിരുന്നു. 20 മത്സരങ്ങളില്‍ ക്‌ളീന്‍ ഷീറ്റ് സ്വന്തമാക്കാനും താരത്തിനായി. നേരത്തെ പി.എഫ്.എയുടെ പ്ലെയര്‍ ഓഫ് ദി ഇയര്‍ പുരസ്‌കാരവും ലിവര്‍പൂള്‍ പ്രതിരോധ താരത്തെ തേടിയെത്തിയിരുന്നു.
പ്രീമിയര്‍ ലീഗ് ആരാധകരുടെയും 20 പ്രീമിയര്‍ ലീഗ് ക്ലബിന്റെ ക്യാപ്റ്റന്മാരുടെയും ഫുട്‌ബോള്‍ നിരീക്ഷകരുടെയും വോട്ടിങ്ങിന്റെ അടിസ്ഥാനത്തിലാണ് വിജയിയെ തിരഞ്ഞെടുത്തത്. കഴിഞ്ഞ സീസണില്‍ ലിവര്‍പൂളിന്റെ തന്നെ മുഹമ്മദ് സലാഹിനെയായിരുന്നു സീസണിലെ താരമായി തിരഞ്ഞെടുത്തത്.