ചണ്ഡിഗഡ്: പ്രധാനമന്ത്രി നരേന്ദ്രമോദിയുടെ തിരഞ്ഞെടുപ്പ് റാലിക്ക് സമീപം ബിരുദദാന വേഷത്തില്‍ പക്കോട വിറ്റ് പ്രതിഷേധിച്ചവരെ പോലിസ് കസ്റ്റഡിയിലെടുത്തു. ചണ്ഡിഗഡില്‍ മോദിയുടെ തിരഞ്ഞെടുപ്പ് റാലി നടത്താനിരുന്ന വേദിക്ക് സമീപമായിരുന്നു മോദിജി കി പകോഡേ എന്ന പേരിട്ട വേറിട്ട പ്രതിഷേധം. റാലി തുടങ്ങുന്നതിന് മുന്‍പ് പ്രതിഷേധക്കാരെ പോലിസ് ഇവരെ കസ്റ്റഡിയിലെടുത്തു. രാജ്യത്തെ തൊഴിലില്ലായ്മയെക്കുറിച്ച് പക്കോഡ വിറ്റാല്‍ ദിനംപ്രതി 200 രൂപ സമ്പാദിക്കാമെന്ന് മോദി പ്രസ്താവന നടത്തിയത് വിവാദമായിരുന്നു. ഇക്കാര്യം ഓര്‍മിപ്പിച്ചായിരുന്നു ബിരുദദാന വേഷത്തില്‍ പക്കോഡ വിറ്റുകൊണ്ടുള്ള പ്രതിഷേധം. എഞ്ചിനീയര്‍മാര്‍ നിര്‍മിച്ച പക്കോഡ വാങ്ങൂ, ബിഎ എല്‍എല്‍ബി പക്കോഡകള്‍ വാങ്ങൂതുടങ്ങിയ ബോര്‍ഡുകളുമായാണ് പ്രതിഷേധക്കാര്‍ എത്തിയത്.