തിരുവനന്തപുരം: ഭരണപരിഷ്‌കരണ കമ്മിഷന്‍ പരാജയമാണെന്ന് കുറ്റപ്പെടുത്തിയ സി.പി.ഐ നേതാവ് സി. ദിവാകരന് മറുപടിയുമായി ഭരണപരിഷ്‌കരണ കമ്മിഷന്‍ അധ്യക്ഷന്‍ വി.എസ് അച്യുതാനന്ദന്‍ രംഗത്ത്.
മലര്‍ന്നുകിടന്ന് തുപ്പുന്നവര്‍ സ്വന്തം മുഖത്തേക്കാണ് തുപ്പുന്നതെന്ന് ഓര്‍ക്കണമെന്ന് വി.എസ് ഫേസ്ബുക്കില്‍ കുറിച്ചു. ഭരണപരിഷ്‌കരണ കമ്മിഷന്‍ പരാജയമാണെന്നും ഒരു മുന്‍മന്ത്രിക്ക് കൊമ്പുണ്ടെന്നും വിമര്‍ശിക്കുമ്പോള്‍ ആ മന്ത്രിസഭയിലിരുന്ന മന്ത്രി എന്താണ് ചെയ്തതെന്ന് ജനങ്ങള്‍ അന്വേഷിക്കും. ഭരണപരിഷ്‌കരണ കമ്മിഷന്‍ ഇതിനകം മൂന്ന് റിപ്പോര്‍ട്ടുകള്‍ സമര്‍പ്പിച്ചിട്ടുണ്ടെന്നും വി.എസ് ഫേസ്ബുക്കില്‍ കുറിച്ചു.
കഴിഞ്ഞ ദിവസം ഭരണപരിഷ്‌കാര വേദി തിരുവനന്തപുരത്ത് സംഘടിപ്പിച്ച ഡി. സാജു അനുസ്മരണ യോഗത്തില്‍ സി. ദിവാകരന്‍ വി.എസ് അച്യുതാനന്ദനെയും മന്ത്രി തോമസ് ഐസകിനെയും രൂക്ഷമായി വിമര്‍ശിച്ചിരുന്നു.
ഭരണപരിഷ്‌കരണ കമ്മിഷന്‍ പരാജയമാണെന്ന് കുറ്റപ്പെടുത്തിയ ദിവാകരന്‍ വി.എസ് സര്‍ക്കാരിന്റെ കാലത്ത് സി.പി.ഐ മന്ത്രിമാരുടെ ഫയലുകളെല്ലാം തോമസ് ഐസക് അനാവശ്യ കാരണം നിരത്തി തടഞ്ഞുവയ്ക്കുമായിരുന്നു എന്നും ധനമന്ത്രിക്ക് കൊമ്പില്ലെന്ന് താന്‍ നേരിട്ട് പറഞ്ഞിട്ടുണ്ടെന്നും വെളിപ്പെടുത്തിയിരുന്നു.
പ്രസംഗം വിവാദമായതോടെ പറഞ്ഞതെല്ലാം നിഷേധിച്ച് മലക്കംമറിയുകയും ചെയ്തു.