ദമാം: ആത്മീയതയുടെ വിശുദ്ധ തീരത്തേക്ക് വിശ്വാസി സമൂഹത്തെ നയിക്കുക എന്ന ലക്ഷ്യം മുന്‍നിര്‍ത്തി എസ് ഐ സി ദമ്മാം സെന്‍ട്രല്‍ കമ്മിറ്റി ആചരിച്ചു വരുന്ന റമളാന്‍ ക്യാമ്പയിന്റെ ഭാഗമായുള്ള തസ്‌കിയത്ത് സംഗമം നടന്നു. പാരഗണ്‍ ഓഡിറ്റോറിയത്തില്‍ വെച്ച് നടന്ന ചടങ്ങില്‍ ക്യാമ്പയിന്‍ വിശകലനവും ആത്മസംസ്‌കരണത്തിന്റെ അനിവാര്യതയ്ക്ക് അടിവരയിടുന്ന പ്രഭാഷണങ്ങളും നടന്നു. പരിപാടിയില്‍ പ്രഗല്‍ഭ പ്രഭാഷകരും സോഷ്യല്‍ സര്‍വീസ് മൂവ്‌മെന്റ് (എസ് എസ് എം) സീനിയര്‍ ട്രെയിനര്‍മാരുമായ ഡോ:സാലിം ഫൈസി കൊളത്തൂര്‍, അബ്ദുല്‍ റഷീദ് ബാഖവി എടപ്പാള്‍ എന്നിവര്‍ പഠന ക്ലാസ്സുകള്‍ നയിച്ചു.

എസ് ഐ സി നാഷണല്‍ വര്‍ക്കിംഗ് സെക്രട്ടറി അബ്ദുറഹ്മാന്‍ മൗലവി അറക്കല്‍ ഉദ്ഘാടനം ചെയ്തു. സവാദ് ഫൈസി വര്‍ക്കല അധ്യക്ഷത വഹിച്ചു. ബഷീര്‍ ബാഖവി, മുസ്തഫ ദാരിമി, ഇബ്രാഹിം ഓമശ്ശേരി, അബ്ദുല്‍ മജീദ് മാസ്റ്റര്‍ വാണിയമ്പലം, അബൂ യാസീന്‍ കൈപ്പമംഗലം, ഖാളി മുഹമ്മദ്, നൂറുദ്ദീന്‍, അബ്ദുല്‍ ജലീല്‍ ഹുദവി സംബന്ധിച്ചു. എസ് എസ് എല്‍ സി, പ്ലസ് ടു പരീക്ഷകളില്‍ ഉന്നത വിജയം കരസ്ഥമാക്കിയ വിദ്യാര്‍ത്ഥികള്‍ക്കുള്ള ട്രെന്‍ഡ് എക്‌സലന്‍സ് അവാര്‍ഡ് വിതരണം സൈനുല്‍ ആബിദീന്‍ തങ്ങള്‍ മൊഗ്രാല്‍, അബ്ദുറഹ്മാന്‍ പൂനൂര്‍, മാഹിന്‍ സാഹിബ് വിഴിഞ്ഞം എന്നിവര്‍ നിര്‍വഹിച്ചു.
സമസ്ത പൊതുപരീക്ഷയില്‍ ഉന്നത വിജയത്തിന് വിദ്യാര്‍ഥികളെ പ്രാപ്തരാക്കിയ അഞ്ച് ഏഴ് പൊതു പരീക്ഷാ ക്ലാസുകളിലെ ഉസ്താദുമാരായ ഫവാസ് ഹുദവി പട്ടിക്കാട്, അബ്ദുല്‍മജീദ് വാഫി കൊടിയൂറ എന്നിവര്‍ക്കുള്ള ഉപഹാരങ്ങള്‍ ഡോ: സാലിം ഫൈസിയും മുഹമ്മദ് കുട്ടി കോഡൂരും നിര്‍വ്വഹിച്ചു. എസ് ഐ സി വര്‍ക്കിംഗ് സെക്രട്ടറി അഹമ്മദ് മന്‍സൂര്‍ ഹുദവി സ്വാഗതവും അഷ്‌റഫ് അഷ്‌റഫി നന്ദിയും പറഞ്ഞു.