കാസര്‍കോട്: കുമ്പള പേരാലില്‍ യുവാവിനെ കഴുത്തറത്ത് കൊലപ്പെടുത്തിയ കേസിലെ പ്രതികളെ നാലുദിവസത്തേക്ക് പൊലിസ് കസ്റ്റഡിയില്‍ വിട്ടു.
പേരാലിലെ അബ്ദുല്‍ സലാമി (27)നെ പെര്‍വാഡ് മാളിയങ്കരക്ക് സമീപം കോട്ടയിലെ ഗ്രൗണ്ടില്‍ തലയറുത്ത് കൊന്ന കേസിലെ ആറു പ്രതികളെയാണ് കാസര്‍കോട് ജുഡീഷ്യല്‍ ഒന്നാംക്ലാസ് മജിസ്‌ട്രേറ്റ് കോടതി (ഒന്ന്) നാല് ദിവസത്തേക്ക് പൊലിസ് കസ്റ്റഡിയില്‍ വിട്ടത്. അന്വേഷണ ഉദ്യോഗസ്ഥനായ കുമ്പള സി.ഐ വി.വി മനോജാണ് പ്രതികളെ കസ്റ്റഡിയില്‍ ആവശ്യപ്പെട്ട് ഹരജി നല്‍കിയത്.
കുമ്പള ബദ്‌രിയ നഗറിലെ മാങ്ങാമുടി സിദ്ദീഖ് എന്ന സിദ്ദീഖ് (39), ബദ്‌രിയ നഗറിലെ ഉമ്മര്‍ ഫാറൂഖ് (29), പെര്‍വാഡിലെ സഹീര്‍ (32), പേരാലിലെ നിയാസ് (31), പെര്‍വാഡ് കോട്ടയിലെ ലത്തീഫ് (36), ആരിക്കാടി ബംബ്രാണയിലെ ഹരീഷ് (29) എന്നിവരെയാണ് കസ്റ്റഡിയില്‍ വിട്ടത്.
കൊലപാതകത്തില്‍ ഇവരെ കൂടാതെ നേരിട്ട് ആരെങ്കിലും പങ്കെടുത്തിട്ടുണ്ടോയെന്ന് പ്രതികളെ കസ്റ്റഡിയില്‍ ലഭിച്ച് ചോദ്യം ചെയ്താല്‍ മാത്രമേ അറിയുകയുള്ളൂവെന്ന പൊലിസിന്റെ വാദം അംഗീകരിച്ചാണ് കസ്റ്റഡിയില്‍ വിട്ടത്.
ഈ കൊലപാതകം കൂടാതെ മറ്റ് ഏതെങ്കിലും കേസുകളില്‍ പ്രതികള്‍ ഉള്‍പ്പെട്ടിട്ടുണ്ടോയെന്നും പൊലിസ് അന്വേഷിക്കുന്നുണ്ട്.
കഴിഞ്ഞ ഏപ്രില്‍ 30ന് വൈകുന്നേരമാണ് മുന്‍വൈരാഗ്യം വെച്ച് പ്രതികള്‍ അബ്ദുല്‍ സലാമിനെ കഴുത്തറത്ത് കൊലപ്പെടുത്തിയത്.