കണ്ണൂര്‍: ചിറക്കല്‍ രാജാസ് ഹൈസ്‌കൂളിലെ പ്ലസ് വണ്‍ വിദ്യാര്‍ഥിയെ തട്ടിക്കൊണ്ടുപോയ രണ്ടംഗ സംഘത്തെ പൊലിസ് അറസ്റ്റ് ചെയ്തു. വളപട്ടണം മൂപ്പന്‍പാറയിലെ പള്ളിവളപ്പില്‍ പ്രണാം(28), മന്നയിലെ കൊടക്കന്‍വീട്ടില്‍ രാഗേഷ്(26) എന്നിവരെയാണ് ഇന്നലെ രാവിലെ പുതിയതെരുവില്‍ വളപട്ടണം എസ്.ഐ ശ്രീജിത്ത് കൊടേരി അറസ്റ്റ്‌ചെയ്തത്. ഏഴിന് രാവിലെ മൂപ്പന്‍പാറയിലെ വീട്ടിലുണ്ടായിരുന്ന വിദ്യാര്‍ഥിയെ കാറിലെത്തിയ പ്രതികള്‍ ബലമായി പിടിച്ചുകൊണ്ടുപോവുകയായിരുന്നു. കാറില്‍ കറങ്ങിയശേഷം ആളൊഴിഞ്ഞ വീട്ടില്‍ കൊണ്ടുപോവുകയും നിര്‍ബന്ധിച്ച് മദ്യം വായില്‍ ഒഴിച്ചുകൊടുക്കുകയും മര്‍ദിക്കുകയും ചെയ്തുവെന്നാണ് പരാതി. നാട്ടുകാരും പൊലിസും അന്വേഷണം നടത്തുന്നതിനിടെ പുലര്‍ച്ചെ രണ്ടോടെ പ്രതികള്‍ വിദ്യാര്‍ഥിയെ മൂപ്പന്‍പാറക്ക് സമീപം കൊണ്ടുവിടുകയായിരുന്നു.