ലണ്ടന്‍: വെസ്റ്റ് ഇന്‍ഡീസിന് തിരിച്ചടിയായി ഓള്‍ റൗണ്ടര്‍ ആന്ദ്രെ റസലിന് പരുക്ക്. കാല്‍ മുട്ടിനേറ്റ പരുക്കിനെ തുടര്‍ന്ന് റസലിന് ലോകകപ്പിലെ ശേഷിക്കുന്ന മത്സരങ്ങള്‍ നഷ്ടമാകും.
സുനില്‍ അംബ്രിസിനെയാണ് റസലിന് പകരം ടീമില്‍ ഉള്‍പ്പെടുത്തിയിരിക്കുന്നത്. വ്യാഴാഴ്ച ഇന്ത്യയുമായുള്ള മത്സരത്തില്‍ അംബ്രിസ് ടീമിനൊപ്പം ചേരും. ആറ് ഏകദിന മത്സരങ്ങളില്‍ നിന്നായി 316 റണ്‍സ് നേടിയ അംബ്രിസിന് മധ്യനിരയില്‍ കരുത്തുപകരാനാവുമെന്നാണ് ടീമിന്റെ കണക്കുകൂട്ടല്‍. 126 ബോളില്‍ 148 റണ്‍സ് അടിച്ചെടുത്ത് ടീമിനെ 328 റണ്‍സ് പിന്തുടര്‍ന്ന് ജയിക്കാന്‍ പ്രാപ്തരാക്കിയ പ്രകടനമാണ് അംബ്രിസിനെ ടീമിലേക്ക് പരിഗണിച്ചത്.
ലോകകപ്പില്‍ നാല് മത്സരങ്ങളില്‍ നിന്നായി അഞ്ച് വിക്കറ്റും 36 റണ്‍സുമാണ് റസലിന്റെ സമ്പാദ്യം.

നിലവില്‍ എട്ടാം സ്ഥാനത്തുള്ള വിന്‍ഡീസിന്റെ സെമി ഫൈനല്‍ സാധ്യത നിലനിര്‍ത്താന്‍ ഇനിയുള്ള മത്സരങ്ങളില്‍ വിജയം അനിവാര്യമാണ്. ഇന്ത്യയെ കൂടാതെ ശ്രീലങ്കയോടും അഫ്ഗാനിസ്താനോടുമാണ് വിന്‍ഡീസിന്റെ നിലനില്‍പ്പിനായുള്ള പോരാട്ടം.

പാകിസ്താനോട് ജയിച്ചു തുടങ്ങിയ വിന്‍ഡീസിന് പക്ഷേ തുടര്‍ന്നുള്ള മത്സരങ്ങളില്‍ വിജയപരമ്പര തുടരാനായില്ല. അസ്‌ത്രേലിയയോടും ന്യൂസിലന്‍ഡിനോടും അവസാന നിമിഷം അടിയറവു പറയേണ്ടി വന്നു. അതിനാല്‍ തന്നെ അപകടകാരികളായ കരീബിയന്‍ നിര പോയന്റ് ടേബിളില്‍ എട്ടാം സ്ഥാനത്താണ്. ഏത് പ്രതിസന്ധികളേയും തരണം ചെയ്ത് ജയിക്കാന്‍ കെല്‍പ്പുള്ള ടീമിന്റെ ഇനിയുള്ള പ്രകടനം കാത്തിരുന്നു കാണാം.