പെരുമ്പാവൂര്‍: മലങ്കര മാര്‍ത്തോമാ സുറിയാനി സഭയുടെ 107-ാമത് സ്റ്റുഡന്റ്‌സ് കോണ്‍ഫറന്‍സ് മെയ് 24 മുതല്‍ 27 വരെ പെരുമ്പാവൂര്‍ മാര്‍ത്തോമാ കോളജ് ഓഫ് മാനേജ്‌മെന്റ് ആന്റ് ടെക്‌നോളജിയിലും മാര്‍ത്തോമാ കോളജ് ഫോര്‍ വുമണിലുമായി നടക്കും. കോണ്‍ഫറന്‍സ് രക്ഷാധികാരി ഡോ.ജോസഫ് മാര്‍ത്തോമാ മെത്രാപൊലീത്ത ഉദ്ഘാടനം ചെയ്യും. താമസ് മാര്‍ തിമൊഥയോസ് എപ്പിസ്‌കോപ്പാ മുഖ്യ പ്രഭാഷണം നടത്തും. ഡോ.യുയാക്കിം മാര്‍ കൂറിലോസ് എപ്പിസ്‌കോപ്പാ അധ്യക്ഷത വഹിക്കും.
100-ാം വയസിലേക്ക് പ്രവേശിക്കുന്ന ഡോ.ഫിലിപ്പോസ് മാര്‍ ക്രിസോസ്റ്റം വലിയ മെത്രാപ്പോലീത്തായെ ആദരിക്കുകയും ആദരസൂചകമായി ആശ്രമം കാമ്പസില്‍ 100 ഫലവൃക്ഷത്തൈകള്‍ നടുകയും ചെയ്യും. കോണ്‍ഫറന്‍സ് പഠന വിഷയാവതരണ സെമിനാറില്‍ ഡോ.എബ്രഹാം മാര്‍ പൗലോസ് എപ്പിസ്‌കോപ്പാ അധ്യക്ഷത വഹിക്കും.
കോണ്‍ഫറന്‍സിനോടനുബന്ധിച്ച് നടക്കുന്ന വിശുദ്ധ കുര്‍ബാനയില്‍ ജോസഫ് മാര്‍ ബര്‍ന്നബാസ് എപ്പിസ്‌കോപ്പാ മുഖ്യ കാര്‍മികത്വം വഹിക്കും. ഡോ.ജോസഫ് മാര്‍ത്തോമ്മാ മെത്രാപോലീത്ത, മാര്‍ത്തോമാ കോളജ് ഓഫ് മാനേജ്‌മെന്റ് ആന്റ് ടെക്‌നോളജി ഡയറക്ടര്‍ ഡോ.രാജന്‍ വര്‍ഗീസ്, മാര്‍ത്തോമാ കോളജ് ഫോര്‍ വുമണ്‍ പ്രിന്‍സിപ്പല്‍ ഡോ.ലിസി ചെറിയാന്‍ എന്നിവര്‍ മാര്‍ത്തോമാ സ്റ്റുഡന്റ്‌സ് കോണ്‍ഫറന്‍സിനു നേതൃത്വം നല്‍കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു.