കോതമംഗലം: യുവതിയെ 13 വര്‍ഷത്തോളം പീഡിപ്പിച്ച ജീപ്പ് ഡ്രൈവറും ഭീഷണിപ്പെടുത്തി പീഡിപ്പിച്ച കേസില്‍ യുവസുഹൃത്തും അറസ്റ്റില്‍. കോട്ടപ്പടി വാവേലി പണ്ടാരത്തുംകുടി രാജീവ് (40), മാതിരപ്പിള്ളി വിളയാല്‍ ദീപുവികാസില്‍ ദീപു (30)എന്നിവരെയാണ് കോട്ടപ്പടി സ്വദേശിനിയായ 25കാരിയുടെ പരാതിയില്‍ പൊലിസ് അറസ്റ്റ് ചെയ്തത്.
വീട്ടില്‍ ആളില്ലാത്ത അവസരങ്ങളില്‍ ഏഴാം ക്ലാസില്‍ പഠിക്കുമ്പോള്‍ മുതല്‍ രാജീവ് പീഡിപ്പിച്ചിരുന്നുവെന്നാണ് യുവതിയുടെ വെളിപ്പെടുത്തല്‍. സ്‌കൂളിലേക്ക് വിദ്യാര്‍ഥികളെ എത്തിച്ചിരുന്ന ജീപ്പിന്റെ ഡ്രൈവറായിരുന്ന രാജീവ്. വീട്ടില്‍ തനിച്ചായിരുന്ന ഒട്ടുമിക്ക അവസരങ്ങളിലും രാജീവ് വീട്ടിലെത്തി പെണ്‍കുട്ടിയെ പീഡിപ്പിച്ചിരുന്നുവെന്ന് പൊലിസിന് തെളിവെടുപ്പില്‍നിന്നു വ്യക്തമായി. വീട്ടുകാര്‍ക്ക് ഇയാളുമായുള്ള അടുപ്പം നശിപ്പിക്കേണ്ടെന്ന് കരുതി വളര്‍ന്നപ്പോഴും രാജീവ് പറഞ്ഞത് അനുസരിക്കുകയായിരുന്നെന്ന് പെണ്‍കുട്ടിയുടെ പൊലിസില്‍ മൊഴി നല്‍കി.
സംഭവത്തില്‍ പിടിയിയിലായ പെണ്‍കുട്ടിയുടെ സുഹൃത്ത് ദീപുവുമായി രണ്ടുവര്‍ഷം മുന്‍പാണ് പരിചയത്തിലാവുന്നത്. രാജീവ് തന്നെ ദുരുപയോഗം ചെയ്തിരുന്ന വിവരം ഫോണ്‍ സംഭാഷണത്തിനിടെ യുവതി ദീപുവുമായി പങ്കുവച്ചത് ഇയാള്‍ മൊബൈല്‍ ഫോണില്‍ റെക്കോര്‍ഡ് ചെയ്യുകയായിരുന്നു. പിന്നീട് സംഭാഷണം റെക്കോര്‍ഡ് ചെയ്തിട്ടുണ്ടെന്നും തനിക്ക് വഴങ്ങിയില്ലങ്കില്‍ നാട്ടില്‍ പ്രചരിപ്പിക്കുമെന്നും ഭീഷണിപ്പെടുത്തി പീഡിപ്പിക്കുകയായിരുന്നു. പിന്നീടും ദീപു ഭീഷണിയുമായി സമീപിച്ചതോടെ യുവതി വീട്ടുകാരോട് വിവരങ്ങള്‍ വെളിപ്പെടുത്തുകയും പൊലിസില്‍ പരാതിപ്പെടുകയുമായിരുന്നു. കുന്നത്തുനാട് സി.ഐക്കാണ് കേസിന്റെ അന്വേഷണ ചുമതല.