തിരുവനന്തപുരം: സംസ്ഥാനത്തെ സര്‍ക്കാര്‍, എയ്ഡഡ് മേഖലകളിലെ പ്രൈമറി, അപ്പര്‍ പ്രൈമറി സ്‌കൂളുകളിലും ഹൈടെക് ലാബുകള്‍ വരുന്നു.

കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എജ്യുക്കേഷന്‍ (കൈറ്റ്) നടപ്പാക്കുന്ന ഹൈടെക് ലാബ് പദ്ധതിയുടെ സംസ്ഥാനതല ഉദ്ഘാടനം നാളെ വൈകിട്ട് മൂന്നിന് തിരുവനന്തപുരം ടാഗോര്‍ തിയറ്ററില്‍ മുഖ്യമന്ത്രി പിണറായി വിജയന്‍ നിര്‍വഹിക്കും. ലിറ്റില്‍ കൈറ്റ്‌സ് യൂനിറ്റുകളുടെ പ്രവര്‍ത്തനത്തില്‍ കഴിഞ്ഞ വര്‍ഷം സംസ്ഥാനതലത്തിലും ജില്ലാതലത്തിലും ഒന്നും രണ്ടും മൂന്നും സ്ഥാനങ്ങള്‍ ലഭിച്ച സ്‌കൂളുകള്‍ക്കുള്ള അവാര്‍ഡ് വിതരണവും ചടങ്ങില്‍ നടക്കും.

ഹൈടെക് ലാബ് പദ്ധതിക്കായി കിഫ്ബി 292 കോടി രൂപ അനുവദിച്ചതിനെത്തുടര്‍ന്ന് 55,086 ലാപ്‌ടോപ്പുകള്‍, യു.എസ്.ബി സ്പീക്കറുകള്‍, 23,170 മള്‍ട്ടിമീഡിയ പ്രൊജക്ടറുകള്‍ എന്നിവ വാങ്ങിയിരുന്നു. നാളെ മുതല്‍ കൈറ്റിന്റെ 14 ജില്ലാ കേന്ദ്രങ്ങളിലൂടെ ഈ ഉപകരണങ്ങളുടെ വിതരണം ആരംഭിക്കും.