ലണ്ട@ന്‍: ലോകകപ്പ് ക്രിക്കറ്റിന്റെ ആദ്യ സെമി ഫൈനല്‍ പോരാട്ടം മഴ കവര്‍ന്നു. ഇന്നലെ നടന്ന മത്സരമാണ് മഴകാരണം നിര്‍ത്തിവച്ചത്. ടോസ് നേടിയ ന്യൂസിലന്‍ഡ് ബാറ്റിങ് തിരഞ്ഞെടുക്കുകയായിരുന്നു. 46.1 ഓവര്‍ ആയപ്പോഴേക്കും മഴയെത്തുകയായിരുന്നു. ഇത്രയും സമയം ബാറ്റ് ചെയ്ത കിവീസ് അഞ്ച് വിക്കറ്റ് നഷ്ടത്തില്‍ 211 റണ്‍സ് മാത്രമേ എടുത്തുള്ളു.
ഇന്ത്യക്ക് ജയപ്രതീക്ഷയുണ്ടായിരുന്ന മത്സരത്തില്‍ അപ്രതീക്ഷിതമായിട്ടായിരുന്നു മഴ എത്തിയത്. മത്സരത്തിന് മുന്‍പ് ചെറിയ തോതില്‍ മഴ ഉണ്ടാകുമെന്നായിരുന്നു പ്രവചിച്ചിരുന്നത്. എന്നാല്‍ കുറച്ച് സമയം ചാറ്റല്‍ മഴ പെയ്തതിന് ശേഷം മഴ കനക്കുകയായിരുന്നു. ഇതിനെ തുടര്‍ന്ന് താരങ്ങള്‍ ഫീല്‍ഡ് വിടുകയും ചെയ്തു. ഇന്ത്യന്‍ നിരയില്‍ കുല്‍ദീപ് യാദവിന് പകരം യൂസ്‌വേന്ദ്ര ചഹലായിരുന്നു കളിച്ചത്. മത്സരം ഇന്ന് തുടരും. ഇന്നും മഴ കാരണം ഉപേക്ഷിക്കേണ്ടി വന്നാല്‍ ഇന്ത്യയെ വിജയിയായി പ്രഖ്യാപിക്കും. കാരണം പട്ടികയില്‍ ന്യൂസിലന്‍ഡിനേക്കാള്‍ പോയിന്റും ജയവും ഇന്ത്യക്കാണ് കൂടുതല്‍. മികച്ച റണ്‍സ് പ്രതീക്ഷിച്ചിറങ്ങിയ ന്യൂസിലന്‍ഡിന് തുടക്കത്തിലേ തിരിച്ചടി നേരിട്ടു. 3.3 ഓവറില്‍ ഒരു റണ്‍സിന് ഗുപ്റ്റിലിന്റെ വിക്കറ്റ് നഷ്ടമായി. ഇതോടെ ഇന്ത്യക്ക് മാനസിക മുന്‍തൂക്കം ലഭിച്ചു. പിന്നീട് കൃത്യതയോടെ പന്തെറിഞ്ഞ ഇന്ത്യന്‍ ബൗളര്‍മാര്‍ കിവീസ് ബാറ്റിങ്‌നിരയെ പിടിച്ച് കെട്ടി. സ്‌കോര്‍ 69 ല്‍ നില്‍ക്കുമ്പോള്‍ കിവീസിന്റെ രണ്ടാം വിക്കറ്റും വീണു. ജഡേജയുടെ പന്തില്‍ ബൗള്‍ഡായാണ് നിക്കോളാസ് മടങ്ങിയത്. പിന്നീടെത്തിയ റോസ് ടെയ്‌ലറും കെയ്ന്‍ വില്യംസണും ക്രീസില്‍ ഉറച്ച് നിന്നു. വമ്പനടികള്‍ക്ക് ശ്രമിക്കാതെ ഇരുവരും ക്ഷമയോടെ റണ്‍സ് കൂട്ടിച്ചേര്‍ത്ത് കൊണ്ടിരുന്നു. എന്നാല്‍ 36-ാം ഓവറില്‍ സ്‌കോര്‍ 134 നില്‍ക്കുമ്പോള്‍ വില്യംസണേയും കിവികള്‍ക്ക് നഷ്ടമായി. ഇതോടെ കിവീസിന്റെ സ്‌കോര്‍ 200 ഉള്ളില്‍ ചുരുങ്ങുമെന്ന് തോന്നി. എന്നാല്‍ പിന്നീട് റോസ് ടെയ്‌ലര്‍ നടത്തിയ രക്ഷാപ്രവര്‍ത്തനമാണ് ന്യൂസിലന്‍ഡിന്റെ സ്‌കോര്‍ 200 കടത്തിയത്. 10 ഓവര്‍ എറിഞ്ഞ ജഡേജ 34 റണ്‍സ് വിട്ട് നല്‍കി ഒരു വിക്കറ്റെടുത്തു. പത്ത് ഓവറില്‍നിന്ന് പാണ്ഡ്യ 55 റണ്‍സ് നല്‍കിയപ്പോള്‍ ചഹലിന്റെ 10 ഓവറില്‍ 63 റണ്‍സ് വിട്ട് നല്‍കി.