തിരുവനന്തപുരം: കാര്യവട്ടം ക്യാംപസിനുള്ളില്‍ നിന്നു ദുരൂഹ സാഹചര്യത്തില്‍ കാണാതായ എന്‍ജിനീയറിങ് വിദ്യാര്‍ഥി ശ്യാം പത്മനാഭനെ കുറിച്ച് വിവരമൊന്നും ലഭിച്ചില്ല. ഈ സാഹചര്യത്തില്‍ കണ്ടെത്താന്‍ പ്രത്യേക അന്വേഷണ സംഘത്തിന് ചുമതല നല്‍കി.
തിരുവനന്തപുരം കോളേജ് ഓഫ് എന്‍ജിനീയറിങിലെ എം.ടെക്. രണ്ടാം വര്‍ഷ വിദ്യാര്‍ഥിയായ ശ്യാം പത്മനാഭനെയാണ് ദുരൂഹമായ സാഹചര്യത്തില്‍ കാണാതായത്. എങ്ങോട്ടുപോയെന്നോ എവിടെയുണ്ടെന്നോ തെളിയിക്കുന്നതിനാവശ്യമായ യാതൊരു സൂചനയും ലഭിക്കാത്തതാണ് പൊലിസിനെ കുഴക്കുന്നത്.

അതുകൊണ്ടാണ് പ്രത്യേക അന്വേഷണ സംഘത്തെ രൂപീകരിക്കാനും തീരുമാനിച്ചത്.
കോഴിക്കോട് വടകര സ്വദേശിയായ ശ്യാം രണ്ടു വര്‍ഷത്തിലേറെയായി പാങ്ങപ്പാറയിലെ ഫ്‌ളാറ്റില്‍ മാതാപിതാക്കളോടൊപ്പമായിരുന്നു താമസം. തിങ്കളാഴ്ച വൈകുന്നേരം ലൈബ്രറിയില്‍ പോകുന്നു എന്നു പറഞ്ഞാണ് ശ്യാം ഫ്‌ളാറ്റില്‍ നിന്നും ഇറങ്ങിയത്.
രാത്രി ഏറെ വൈകിയും വീട്ടില്‍ എത്താതായതോടെയാണ് ബന്ധുക്കള്‍ കഴക്കൂട്ടം പൊലിസില്‍ പരാതി നല്‍കിയത്.

പൊലിസ് മൊബൈല്‍ ഫോണിന്റെ ടവര്‍ ലൊക്കേഷന്‍ പരിശോധിച്ചതില്‍ നിന്നു കാര്യവട്ടം ക്യാംപസിലാണ് അവസാനമായി ടവര്‍ ലൊക്കേഷന്‍ കാണിച്ചത്.
ഡോഗ് സ്‌ക്വാഡിന്റെ സഹായത്തോടെ ക്യാംപസിനുള്ളില്‍ തിരച്ചില്‍ നടത്തിയെങ്കിലും മണം പിടിച്ചെത്തിയ നായ്ക്കള്‍ ഹൈമവതി കുളത്തിനരികില്‍ നില്‍ക്കുകയായിരുന്നു. ശ്യാം കുളത്തിലേക്ക് ഇറങ്ങിയതിനെ സാധൂകരിക്കുന്ന തെളിവുകള്‍ ഒന്നും ലഭിച്ചിട്ടില്ലെന്ന് പൊലിസ് പറയുന്നു. തുടര്‍ന്നങ്ങോട്ട് എന്തു സംഭവിച്ചു എന്നതിനാണ് സൂചന ലഭിക്കേണ്ടത്.
കുളത്തില്‍ വീണതാണെന്ന് പറയാനാവില്ലെന്ന് പൊലിസ് പറയുന്നു. കുളത്തിനു ചുറ്റുമുള്ള കാട്ടില്‍ തിരച്ചില്‍ നടത്തിയിട്ടും ഇവിടെ നിന്ന് എങ്ങോട്ട് പോയി എന്നതിനെക്കുറിച്ചുള്ള സൂചനകള്‍ ലഭിച്ചിട്ടില്ല.
ഈ സാഹചര്യത്തിലാണ് കഴക്കൂട്ടം സൈബര്‍ സിറ്റി അസിസ്റ്റന്റ് കമ്മീഷണര്‍ അനില്‍കുമാറിന്റെ നേതൃത്വത്തില്‍ പ്രത്യേക സംഘം രൂപീകരിച്ച് അന്വേഷണം ആരംഭിച്ചത്.