റിയാദ്: റിയാദിൽ രഹസ്യമായി അബോർഷൻ കേന്ദ്രം നടത്തിയ വിദേശ ഡോക്ടർ പിടിയിൽ. സുരക്ഷാ അധികൃതരുടെ സഹായത്തോടെ നടത്തിയ നീക്കത്തിലാണ് യാതൊരു സുരക്ഷാ മാനദണ്ഡങ്ങളും പാലിക്കാതെ രഹസ്യമായി അബോർഷൻ നടത്തുന്ന കേന്ദ്രം റിയാദ് ആരോഗ്യ വകുപ്പ് കണ്ടെത്തിയത്. സ്വകാര്യ മെഡിക്കൽ കോംപ്ലക്‌സിൽ അനുമതിയില്ലാതെ ഡോക്ടർ അബോർഷൻ നടത്തുന്നതായി വിവരം ലഭിച്ചതിനെ അടിസ്ഥാനത്തിൽ നടത്തിയ രഹസ്യ നീക്കത്തിലാണ് തെളിവുകൾ സഹിതം ഡോക്ടറെ പിടികൂടിയത്. 

    അബോർഷൻ നടത്തുന്നതായി വിവരം ലഭിച്ചതിനെ തുടർന്ന് അധികൃതർ ആവശ്യക്കാരെന്ന രൂപേണ ഡോക്ടറെ സമീപിച്ച് അബോർഷൻ നടത്താനുള്ള നപടികൾ അന്വേഷിക്കുകയും 7000 റിയാലിന് അബോർഷൻ നടത്താനുള്ള കരാറിൽ എത്തുകയും ചെയ്‌തു. പിന്നീടാണ് സുരക്ഷാ ഉദ്യോഗസ്ഥരുടെ സഹായത്തോടെ ഡോക്ടറെ പിടികൂടുകയും കേന്ദ്രത്തിൽ റെയ്‌ഡ് നടത്തുകയും ചെയ്‌തത്‌. ഏതാനും ദിവസങ്ങളായി ഇവിടെ അബോർഷൻ തുടർച്ചയായി നടന്നിരുന്നതായി അധികൃതർ കണ്ടെത്തിയിയിട്ടുണ്ട്. ഡോക്ടർ ഏത് രാജ്യക്കാരാണെന്ന് അധികൃതർ വ്യക്തമാക്കിയിട്ടില്ല. തുടർന് നടപടികൾക്കായി ഡോക്ടറെ ബന്ധപ്പെട്ട വകുപ്പുകൾക്ക് കൈമാറി.