ഏറ്റുമാനൂര്‍: എം.സി റോഡില്‍ മഹാദേവ ക്ഷേത്രത്തിനു സമീപം ദമ്പതികള്‍ സഞ്ചരിച്ച സ്‌കൂട്ടറില്‍ ലോറിയിടിച്ച് ഭര്‍ത്താവ് മരിച്ചു. റിട്ട. സി.ആര്‍.പി.എഫ് ഉദ്യോഗസ്ഥന്‍ നീണ്ടൂര്‍ വടക്കേടത്ത് സോമന്‍ (67) ആണ് മരിച്ചത്. ഭാര്യ ശാന്തമ്മ (54) യെ ഗുരുതര പരുക്കുകളോടെ ആശുപത്രിയില്‍ പ്രവേശിപ്പിച്ചു.
ഇന്നലെ രാവിലെ 6.30നായിരുന്നു അപകടം. ക്ഷേത്ര ദര്‍ശനത്തിന് പോവുകയായിരുന്ന ദമ്പതികള്‍ സഞ്ചരിച്ച സ്‌കൂട്ടര്‍ മാരിയമ്മന്‍ കോവില്‍ റോഡില്‍നിന്ന് എം.സി റോഡിലൂടെ ക്ഷേത്രം റോഡിലേക്ക് തിരിയും വഴി തവളക്കുഴിയില്‍നിന്ന് വരികയായിരുന്ന നാഷനല്‍ പെര്‍മിറ്റ് ലോറിയിടിക്കുകയായിരുന്നു. സ്‌കൂട്ടറില്‍നിന്ന് തെറിച്ച് റോഡില്‍ തലയിടിച്ച് വീണ സോമനെ കോട്ടയം മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.
ശാന്തമ്മയുടെ കാലുകള്‍ക്ക് പരുക്കുണ്ട്. മക്കള്‍: വിഷ്ണു, വിജയലക്ഷ്മി. മരുമകന്‍: സുധീഷ് (പാലക്കാട്). ഏറ്റുമാനൂര്‍ പൊലിസ് കേസെടുത്തു. സംസ്‌കാരം പിന്നീട്.