പാലക്കാട് : തമിഴ്‌നാട്ടില്‍ നിന്നും പാലക്കാട്, വടക്കഞ്ചേരി , ആലത്തൂര്‍ മേഖലകള്‍ കേന്ദ്രീകരിച്ച് ചില്ലറ വില്‍പന നടത്തുന്നതിനായി കൊണ്ടുവന്ന ഒന്നര കിലോ കഞ്ചാവുമായി രണ്ട് യുവാക്കള്‍ പാലക്കാട് നോര്‍ത്ത് പൊസിന്റെ പിടിയിലായി. വടക്കഞ്ചേരി , എളവമ്പാടം, കൊഴുക്കുള്ളി സ്വദേശികളായ സനീഷ് (30), അനീഷ് കുമാര്‍ (28) എന്നിവരെ യാ ണ് ഇന്നലെ രാത്രി പാലക്കാട് മുനിസിപ്പല്‍ ബസ് സ്റ്റാന്‍ഡ് പരിസരത്ത് വെച്ച് ടൗണ്‍ നോര്‍ത്ത് എസ്.ഐ. രഞ്ജിത്തും സംഘവും അറസ്റ്റു ചെയ്തത്.
ടൗണ്‍ നോര്‍ത്ത് ഇന്‍സ്‌പെക്ടര്‍ ഇ. അലവിക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന നടത്തിയത്. പ്രതികളുടെ പക്കല്‍ നിന്നും പിടിച്ചെടുത്ത കഞ്ചാവിന് ചില്ലറ വിപണിയില്‍ മുക്കാല്‍ ലക്ഷത്തോളം രൂപ വില വരും. തമിഴ്‌നാട്ടിലെ കമ്പം ,തേനി , ദിണ്ടിഗല്‍, മധുര, സേലം, ഈറോഡ്, പഴനി, വെത്തലക്കുണ്ട് , ഉടുമല്‍പേട്ട എന്നിവിടങ്ങളില്‍ നിന്നാണ് കേരളത്തിലേക്ക് കഞ്ചാവ് എത്തുന്നത്. 15000 രൂപക്ക് കിട്ടുന്ന ഒരു കിലോ കഞ്ചാവ് 50000 രൂപക്കാണ് ചില്ലറ വിപണിയില്‍ വില്‍ക്കുന്നത്. 10 ഗ്രാം അടങ്ങുന്ന ഒരു പായ്ക്കറ്റിന് 500 രൂപയാണ് ഈടാക്കുന്നത്. പിടിയിലായ സനീഷ് നേരത്തെ എറണാകുളം ജില്ലയിലെ ചേരാനല്ലൂര്‍ പൊലിസ് സ്റ്റേഷന്‍ പരിധിയില്‍ നടന്ന ഇംത്യാസ് കൊലപാതകക്കേസിലെ പ്രതിയാണ്. 5 വര്‍ഷത്തെ ജയില്‍വാസത്തിനുശേഷം കഴിഞ്ഞ വര്‍ഷമാണ് പുറത്തിറങ്ങിയത്.
നടപടിക്രമങ്ങള്‍ക്കു ശേഷം പ്രതികളെ ഇന്ന് കോടതിയില്‍ ഹാജരാക്കി റിമാന്‍ഡ് ചെയ്തു. ജില്ലാ ലഹരി വിരുദ്ധ സ്‌ക്വാഡ് അംഗങ്ങളായ രഞ്ജിത്ത്, . കിഷോര്‍, സുനില്‍ , അഹമ്മദ് കബീര്‍, വിനീഷ്, . രാജീദ്, .സജീന്ദ്രന്‍, വിമല്‍, സ്‌പെഷ്യല്‍ ബ്രാഞ്ച് ഉദ്യോഗസ്ഥന്‍ . നന്ദകുമാര്‍ എന്നിവരടങ്ങിയ സംഘമാണ് കഞ്ചാവ് കടത്ത് പിടികൂടിയത്,