പോത്തന്‍കോട്: ശ്രീചിത്ര ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസില്‍ ആദ്യ ഹൃദയ വാല്‍വ് മാറ്റിവയ്ക്കല്‍ ശസ്ത്രക്രിയക്ക് വിധേയനായ കാട്ടായിക്കോണം കുറവിളാകം അജയ് നിവാസില്‍ എസ്. സുഗതന്‍ (55 ) മരിച്ചു.
1991 ല്‍ സുഗതന് 28 വയസുള്ളപ്പോഴാണ് വാല്‍വ് മാറ്റിവച്ചത്. ശ്രീചിത്രയില്‍ തന്നെ വികസിപ്പിച്ചെടുത്ത ഹൃദയ വാല്‍വ് ആയിരുന്നു മാറ്റിവച്ചത്. അന്ന് ദേശീയ മാധ്യമങ്ങളിലടക്കം ഇത് വലിയ വാര്‍ത്തയുമായിരുന്നു. തുടര്‍ന്ന് ശ്രീചിത്രയില്‍ തന്നെ സൗജന്യ തുടര്‍ ചികിത്സയും നല്‍കി വന്നിരുന്നു.
ശസ്ത്രക്രിയക്ക് ശേഷം കുറേക്കാലം കാര്‍ ഡ്രൈവറായി ജോലിചെയ്ത സുഗതന്‍ പിന്നീട് പെട്ടിക്കട നടത്തിവരികയായിരുന്നു. ദിവസങ്ങള്‍ക്ക് മുന്‍പ് നെഞ്ചുവേദന അനുഭവപ്പെട്ടതിനെ തുടര്‍ന്ന് ആശുപത്രിയില്‍ പ്രവേശിപ്പിച്ചിരുന്നു. ചികിത്സയിലിരിക്കെ ഇന്നലെ മരിച്ചു. ഭാര്യ: എസ്. ഷീജ. മക്കള്‍: അജയ്,ആതിര. മരുമകന്‍: പ്രവീണ്‍(യാരബ് ടെക്‌നോളജീസ്,ടെക്‌നോപാര്‍ക്ക് ).