തിരുവനന്തപുരം: ശബരിമല സ്ത്രീപ്രവേശന വിഷയത്തില്‍ ദേവസ്വം ബോര്‍ഡ് വിളിച്ചു ചേര്‍ത്ത സമവായ ചര്‍ച്ച ഇന്ന് നടക്കും. രാവിലെ 10ന് ദേവസ്വം ബോര്‍ഡ് ആസ്ഥാനത്താണ് യോഗം. തന്ത്രി കുടുംബം, അയ്യപ്പസേവാ സംഘം, പന്തളം കൊട്ടാരം പ്രതിനിധികള്‍ എന്നിവരുമായാണ് ചര്‍ച്ച. പന്തളം കൊട്ടാരം പ്രതിനിധികളും അയ്യപ്പസേവാ സംഘവും ചര്‍ച്ചയില്‍ പങ്കെടുക്കുമെന്ന് അറിയിച്ചിട്ടുണ്ട്.
യോഗത്തില്‍ രാജകുടുംബത്തിന്റെ നിര്‍ദേശങ്ങള്‍ മുന്നോട്ടുവയ്ക്കുമെന്ന് പന്തളം കൊട്ടാരം പ്രതിനിധികള്‍ പറഞ്ഞു. ആവശ്യങ്ങളില്‍നിന്ന് പിന്നോട്ടില്ല. ഇക്കാര്യം യോഗത്തില്‍ അറിയിക്കും. നിര്‍ദേശങ്ങള്‍ അംഗീകരിക്കാന്‍ തയാറായില്ലെങ്കില്‍ ചര്‍ച്ചയില്‍ തുടരില്ല. ഭക്തരുടെ വികാരം സര്‍ക്കാരും ദേവസ്വം ബോര്‍ഡും മനസിലാക്കി തുടങ്ങിയതാണ് ചര്‍ച്ചക്ക് അടിസ്ഥാനമെന്നും അവര്‍ പറഞ്ഞു.
അതിനിടെ, ശബരിമലയിലെത്തുന്ന സ്ത്രീകളെ തടയില്ലെന്ന് അയ്യപ്പസേവാ സംഘം വ്യക്തമാക്കി. ദേവസ്വം ബോര്‍ഡ് വിളിച്ചു ചേര്‍ത്ത യോഗത്തില്‍ പങ്കെടുക്കുന്നതിനു മുന്നോടിയായുള്ള ഈ അഭിപ്രായ പ്രകടനം ചര്‍ച്ചകള്‍ ഫലവത്താകുമെന്ന സൂചനയാണ് നല്‍കുന്നത്.
മണ്ഡല, മകരവിളക്ക് ഉത്സവം നല്ലരീതിയില്‍ നടത്തുന്ന കാര്യങ്ങളാകും യോഗത്തില്‍ ചര്‍ച്ച ചെയ്യുകയെന്ന് ദേവസ്വം ബോര്‍ഡ് പ്രസിഡന്റ് എ. പദ്മകുമാര്‍ കഴിഞ്ഞ ദിവസം പറഞ്ഞിരുന്നു. കോടതി ഉത്തരവിന്റെ പശ്ചാത്തലത്തില്‍ പ്രശ്‌നങ്ങള്‍ സങ്കീര്‍ണമാക്കാതെ എല്ലാവരുമായും ചര്‍ച്ചനടത്തി താല്‍ക്കാലികമായെങ്കിലും സമവായമുണ്ടാക്കുകയാണ് ഇന്നത്തെ ചര്‍ച്ചകൊണ്ട് ദേവസ്വം ബോര്‍ഡ് ലക്ഷ്യമിടുന്നത്.
ആചാരങ്ങള്‍ ഇല്ലാതാക്കി മുന്നോട്ടു പോകാനല്ല ബോര്‍ഡ് ഉദ്ദേശിക്കുന്നതെന്ന പദ്മകുമാറിന്റെ അഭിപ്രായപ്രകടനം പ്രശ്‌നങ്ങള്‍ ലഘൂകരിക്കുകയെന്ന ലക്ഷ്യത്തോടെയുള്ളതാണ്.