വാഷിങ്ടണ്‍: എച്ച് 1 ബി വിസയുമായി ബന്ധപ്പെട്ടുള്ള യു.എസ് ഭരണകൂടത്തിന്റെ തീരുമാനങ്ങള്‍ക്കെതിരേ നിയമ നടപടിയുമായി ഐ.ടി കമ്പനികള്‍. എച്ച് 1 ബി വിസയുടെ കാലയളവ് മൂന്ന് വര്‍ഷത്തില്‍ കുറവ് ആയി ചുരുക്കിയതിനെതിരേയാണ് ആയിരത്തോളം ചെറു ഐ.ടി കമ്പനികളുടെ ഗ്രൂപ്പായ ഐ.ടി സെര്‍വ് അലയന്‍സ് കേസ് ഫയല്‍ ചെയതത്.
എച്ച് 1 ബി വിസ മൂന്ന് വര്‍ഷത്തില്‍ കുറവ് മാത്രമാണ് സര്‍ക്കാര്‍ അനുവദിക്കുന്നുള്ളൂവെന്ന് ആരോപിച്ചാണ് 43 പേജുള്ള പരാതി കമ്പനി നല്‍കിയത്. മൂന്ന് മുതല്‍ ആറു വര്‍ഷം വരെയാണ് എച്ച് 1 ബി വിസ സാധാരണയായി അനുവദിക്കാറുള്ളത്. നിലവിലുള്ള നിയമത്തിന് വിരുദ്ധമായി വിസ കാലയളവ് ചുരുക്കാന്‍ യുനൈറ്റഡ് സ്റ്റേറ്റ്‌സ് സിറ്റിസണ്‍ഷിപ്പ് ആന്‍ഡ് ഇമിഗ്രേഷന്‍ സര്‍വിസസിന് (യു.എസ്.സി.ഐ.എസ്) അധികാരമില്ലെന്ന് കമ്പനി പറഞ്ഞു.
യു.എസിലെ തൊഴില്‍ ദാതാക്കള്‍ക്ക് മറ്റു രാജ്യങ്ങളില്‍ നിന്ന് ഉയര്‍ന്ന യോഗ്യതകളുള്ള തൊഴിലാളികളെ കൊണ്ടുവരുന്നതിനുള്ള പദ്ധതിയാണ് എച്ച് 1 ബി വിസ പ്രോഗ്രാം.