കൊച്ചി: ലാത്തിച്ചാര്‍ജ് വിവാദത്തില്‍ ഒടുവില്‍ പൊലിസിന്റെ നടപടി. കൊച്ചി സെന്‍ട്രല്‍ എസ്.ഐആയ വിപിന്‍ദാസിനെയാണ് ഡി.ഐ.ജി സസ്‌പെന്‍ഡ് ചെയ്തത്.

ലാത്തിച്ചാര്‍ജ്ജില്‍ എസ്.ഐയുടെ ഭാഗത്ത് നിന്ന് നോട്ടക്കുറവുണ്ടായെന്ന് കാരണത്തിലാണ് സസ്‌പെന്‍ഷന്‍. എല്‍ദോ എബ്രഹാം എം.എല്‍.എയെ തിരിച്ചറിയുന്നതില്‍ എസ്.ഐ വിപിന്‍ദാസിന് വീഴ്ച പറ്റിയെന്നാണ് കണ്ടെത്തല്‍.

നിയമവിരുദ്ധമായി പ്രവര്‍ത്തിക്കുന്ന ഞാറയ്ക്കല്‍ സിഐക്കെതിരെ നടപടി ആവശ്യപ്പെട്ട് എറണാകുളത്തെ റേഞ്ച് ഐജി ഓഫിസിലേക്ക് സി.പി.ഐ നടത്തിയ മാര്‍ച്ചിന് നേരെ പൊലിസ് നടപടിയുണ്ടായതാണ് വിവാദങ്ങളുടെ തുടക്കം. സംഘര്‍ഷത്തില്‍ സി.പി.ഐ ജില്ലാ സെക്രട്ടറി പി രാജു, മൂവാറ്റുപുഴ എം.എല്‍.എ എല്‍ദോ എബ്രഹാം എന്നിവര്‍ക്ക് പൊലീസ് മര്‍ദ്ദനമേറ്റതായും ആരോപണമുയര്‍ന്നിരുന്നു.

പൊലീസുകാര്‍ക്കെതിരെ നടപടിയെടുക്കാന്‍ ആവില്ലെന്നായിരുന്നു സംസ്ഥാന പൊലിസ് മേധാവി റിപ്പോര്‍ട്ട് നല്‍കിയത്. ജില്ലാ കലക്ടറുടെ അന്വേഷണ റിപ്പോര്‍ട്ടില്‍ പൊലീസുകാരുടെ പിഴവുകള്‍ എടുത്തുപറയാത്തതിനാല്‍ നടപടിയെടുക്കാന്‍ ആവില്ലെന്നായിരുന്നു ആഭ്യന്തരസെക്രട്ടറിയെ ഡി.ജി.പി അറിയിച്ചത്.