ന്യൂഡല്‍ഹി: ഇന്ത്യയും പാകിസ്താനും തമ്മിലുള്ള സംഘര്‍ഷാവസ്ഥ കുറയ്ക്കാന്‍ ഇടപെടുന്ന കാര്യത്തില്‍ മുന്‍ നിലപാട് മയപ്പെടുത്തി യു.എസ്. ആവശ്യപ്പെട്ടാല്‍ മാത്രം കശ്മീര്‍ വിഷയത്തില്‍ മധ്യസ്ഥതയെന്നു പ്രഖ്യാപിച്ചിരിക്കുകയാണ് യു.എസ് സ്റ്റേറ്റ് ഡിപ്പാര്‍ട്ട്‌മെന്റ്.

ഇരു രാജ്യങ്ങള്‍ തമ്മിലുള്ള സംഘര്‍ഷാവസ്ഥ കുറയ്ക്കാന്‍ മധ്യസ്ഥതയോ, ആവശ്യമായതോ ചെയ്യുമെന്ന് നേരത്തെ യു.എസ് പ്രസിഡന്റ് ഡൊണാള്‍ഡ് ട്രംപ് പ്രഖ്യാപിച്ചിരുന്നു. ഈ നിലപാടാണ് ഇപ്പോള്‍ മയപ്പെടുത്തിയിരിക്കുന്നത്.

ഫ്രാന്‍സില്‍ ജി-7 ഉച്ചകോടിയുടെ ഭാഗമായി ട്രംപും പ്രധാനമന്ത്രി നരേന്ദ്ര മോദിയും കൂടിക്കാഴ്ച നടക്കാനിടയുണ്ട്. ഇതിനു മുന്നോടിയായാണ് ഇക്കാര്യത്തില്‍ യു.എസ് സ്‌റ്റേറ്റ് ഡിപ്പാര്‍ട്ട്‌മെന്റ് നിലപാട് വ്യക്തമാക്കിയതെന്നാണ് സൂചന.