തിരുവനന്തപുരം: ചെക്ക് കേസില്‍ പരാതിക്കാരന്‍ നാസില്‍ അബ്ദുല്ലയുമായി തുഷാര്‍വെള്ളാപ്പള്ളി ഒത്തുതീര്‍പ്പ് ചര്‍ച്ച നടത്തി. ദുബൈയിലെ ഒരു ഹോട്ടലില്‍ വച്ചാണ് ചര്‍ച്ച നടന്നത്. പ്രശ്‌നം രമ്യമായി പരിഹരിക്കുമെന്ന് ചര്‍ച്ചക്ക് ശേഷം പരാതിക്കാരന്‍ നാസില്‍ അബ്ദുല്ല മാധ്യമങ്ങളോട് പറഞ്ഞു. കോടതിക്ക് പുറത്ത്‌വച്ച് തന്നെ കേസ് പരിഹരിക്കാനുള്ള ശ്രമമാണ് നടക്കുന്നത്.

ലഭിക്കാനുള്ള മുഴുവന്‍ തുകയും ലഭിക്കാതെ കേസ് പിന്‍വലിക്കില്ലെന്ന് നാസില്‍ നേരത്തേ ഏഷ്യാനെറ്റ് ന്യൂസ് ചാനലിനോട് പറഞ്ഞിരുന്നു. ഏതുവിധത്തിലുള്ള ചര്‍ച്ചക്കും തയാറാണെന്നും ചെക്കിലെ ഒപ്പ് വ്യാജമാണെങ്കില്‍ തുഷാറിന് കോടതിയില്‍ തെളിയിക്കാമെന്നും നാസില്‍ പറഞ്ഞു. തുഷാര്‍ പണം നല്‍കാനുള്ള ധാരാളം പേര്‍ ഗള്‍ഫിലുണ്ട്. ഭയം കാരണം പലരും പരാതിപ്പെടാതിരിക്കുകയാണ്.

തുഷാര്‍ കാരണം തനിക്ക് ആറ് മാസം ജയില്‍വാസം അനുഭവിക്കേണ്ടി വന്നിട്ടുണ്ട്. ബി.ജെ.പി സംസ്ഥാന അധ്യക്ഷന്റ ശ്രീധരന്‍ പിള്ളക്ക് ഇതുസംബന്ധിച്ച് പരാതി നല്‍കിയിരുന്നു. എന്നാല്‍ ഘടകക്ഷി നേതാവായതിനാല്‍ ഇടപെടാനാകില്ലെന്ന് പറഞ്ഞ് ഒഴിവാകുകയാണ് ചെയ്തത്. ഇതുവരേ ഭീഷണികളൊന്നും നേരിട്ടില്ലെങ്കിലുംതന്റെ സുരക്ഷസംബന്ധിച്ച് ആശങ്കകളുണ്ടെന്നും അദ്ദേഹം നേരത്തേ സൂചിപ്പിച്ചിരുന്നു.