കല്ലമ്പലം: വിഴിഞ്ഞത്തു നിന്നും മലപ്പുറത്തേക്കു കണ്ടെയ്‌നര്‍ ലോറിയില്‍ കൊണ്ടു പോകുകയായിരുന്ന അഴുകി ദുര്‍ഗന്ധംവമിക്കുന്ന ചള്ള ഇനത്തില്‍പ്പെട്ട മത്സ്യം പിടികൂടി. കഴിഞ്ഞ ദിവസം വൈകിട്ട് അഞ്ചോടെ കല്ലമ്പലം എസ്.ഐ പി. അഭിലാഷിന് ലഭിച്ച രഹസ്യവിവരത്തെ തുടര്‍ന്ന് വാഹനപരിശോധനക്കിടയില്‍ ദേശീയപാതയില്‍ ആഴാംകോണത്തിനു സമീപം വച്ചാണ് പിടികൂടിയത്.
ലോറിക്കുള്ളില്‍ ആയിരത്തില്‍പ്പരം പെട്ടികളില്‍ ഐസിട്ട് നിറച്ച നിലയിലായിരുന്നു മത്സ്യം. പെട്ടികളെല്ലാം പരിശോധനക്കായി പുറത്തിറക്കി. കരിമീന്‍ വര്‍ഗത്തില്‍പ്പെട്ട അഴുകി ദുര്‍ഗന്ധം പരത്തുന്ന ചള്ള മീനുകളായിരുന്നു മുഴുവനും. ഇത് ഉണക്കി ഉപയോഗിക്കാനാണോ അതോ മറ്റെന്തെങ്കിലും ഉദ്ദേശമുണ്ടോ എന്നു സംശയിക്കുന്നതായും ഇതിനുള്ളില്‍ മറ്റെന്തെങ്കിലും അനധികൃത വസ്തുക്കള്‍ ഒളിപ്പിച്ചിട്ടുണ്ടോ എന്നകാര്യം വിശദമായ പരിശോധനക്കു ശേഷമേ അറിയാന്‍ കഴിയുവെന്നും എസ്.ഐ പി. അഭിലാഷ് പറഞ്ഞു. എന്നാല്‍ വളത്തിനായി കൊണ്ടു പോകുന്നുവെന്നാണ് ഡ്രൈവര്‍ പറയുന്നത്. സംഭവം അറിഞ്ഞു വന്‍ ജനം തടിച്ചുകൂടി. രാത്രി ഏറെ വൈകിയും പെട്ടികള്‍ മുഴുവന്‍ പുറത്തിറക്കിയുള്ള പരിശോധന പൂര്‍ത്തിയായിട്ടില്ല. പ്രദേശം മുഴുവന്‍ ദുര്‍ഗന്ധപുരിതമാണ്.