റിയോ ഡി ജനീറോ: ഒളിംപിക് ടെന്നീസില്‍ എല്ലാ വിഭാഗത്തിലും മത്സരിക്കുമെന്ന് സൂപ്പര്‍ താരം റാഫേല്‍ നദാല്‍. കഴിഞ്ഞ ദിവസം പരുക്ക് രൂക്ഷമാവുമെന്ന് ഭയന്ന് താരം സിംഗിള്‍സില്‍ നിന്ന് പിന്മാറുമെന്ന് പറഞ്ഞിരുന്നു. എന്നാല്‍ ടീമംഗങ്ങളുമായി ഇക്കാര്യം ചര്‍ച്ച ചെയ്തു. തുടര്‍ന്ന് മത്സരിക്കാന്‍ തീരുമാനിക്കുകയായിരുന്നുവെന്ന് നദാല്‍ പറഞ്ഞു. പരുക്കിനെ കുറിച്ച് ചിന്തിക്കുന്നില്ല. കഴിയാവുന്നത്ര മത്സരങ്ങള്‍ കളിക്കാനാണ് തീരുമാനം. ഇതിന്റെ ഭാഗമായി പരിശീലനം വര്‍ധിപ്പിച്ചിട്ടുണ്ടെന്നും നദാല്‍ കൂട്ടിച്ചേര്‍ത്തു.

വാവ്‌റിങ്ക
ഒളിംപിക്‌സിനില്ല

റിയോ ഡി ജനീറോ: സ്വിറ്റ്‌സര്‍ലന്‍ഡ് താരം സ്റ്റാനിസ്ലാസ് വാവ്‌റിങ്ക റിയോ ഒളിംപിക്‌സില്‍ നിന്നു പിന്മാറി. പരുക്കിനെ തുടര്‍ന്നാണ് താരത്തിന്റെ പിന്മാറ്റം. ബെലിന്ദ ബെന്‍സിക്കിനും റോജര്‍ ഫെഡറര്‍ക്കും ശേഷം റിയോയില്‍ നിന്ന് പിന്മാറുന്ന മൂന്നാമത്തെ സ്വിസ് താരമാണ് വാവ്‌റിങ്ക.
ഒളിംപിക്‌സില്‍ മത്സരിക്കാനാവാത്തതില്‍ അതിയായ ദുഃഖമുണ്ട്. റിയോയില്‍ മത്സരിക്കണമെന്ന് ആഗ്രഹമുണ്ടായിരുന്നു. എന്നാല്‍ ആരോഗ്യം അതിന് അനുവദിക്കുന്നില്ലെന്നു വാവ്‌റിങ്ക വ്യക്തമാക്കി.