മാനന്തവാടി: ആയുധ പൂജയും പ്രതീകാത്മക നായാട്ടും നടത്തി ജില്ലയിലെ കുറിച്യ തറവാടുകളില്‍ തുലാപ്പത്ത് ആഘോഷം. ആയുധപൂജയാണ് തുലാപ്പത്ത് ആഘോഷത്തിന്റെ പ്രധാന ചടങ്ങ്. ജില്ലയിലെ എല്ലാ കുറിച്യ തറവാടുകളിലും വീടുകളിലും ആഘോഷമുണ്ടായി. വാളാട് എടത്തന കുറിച്യ തറവാട്ടില്‍ നടന്ന തുലാപ്പത്ത് ആഘോഷം ഇന്നലെ രാവിലെ ഒന്‍പത് മണിയോടെ ആരംഭിച്ചു.
പുരുഷന്‍മാര്‍ തറവാട്ടിലെത്തിച്ച അമ്പുംവില്ലും അണ്ണന്‍, ചന്തു ചേര്‍ന്ന് പൂജിച്ചു നല്‍കി. മറ്റ് ചടങ്ങുകള്‍ പൂര്‍ത്തിയാക്കിതോടെ വിഭവസമൃദ്ധമായ ഭക്ഷണത്തിന് ശേഷം എല്ലാവരും ചേര്‍ന്ന് പ്രതീകാത്മകമായി നായാട്ടും നടത്തി. ആയുധ പൂജയ്ക്ക് ശേഷം നായാട്ട് നടത്തി മൃഗത്തെ പിടിക്കുന്നതാണ് പതിറ്റാണ്ടുകളായി തുടരുന്ന ആചാരം. എന്നാല്‍ വനം വകുപ്പ് മൃഗവേട്ട നിരോധിച്ചതിനാലാണ് ഈ ചടങ്ങ് പ്രതീകാത്മകമായി മാത്രം നടത്തേണ്ടി വന്നതെന്ന് ഇവര്‍ പറയുന്നു. കുട്ടികളുള്‍പ്പെടെ നൂറിലേറെ പേരാണ് എടത്തനയില്‍ നടന്ന തുലാപ്പത്ത് ആഘോഷത്തില്‍ പങ്കെടുത്തത്.പ്രളയക്കെടുതികള്‍ എടത്തന പ്രദേശത്തെ കാര്യമായി ബാധിച്ചിരുന്നെങ്കിലും തുലാപ്പത്ത് ആഘോഷത്തിന് മാറ്റുകുറഞ്ഞിരുന്നില്ല. പരമ്പരാഗത നെല്‍കൃഷിയുടെ കേന്ദ്രം കൂടിയാണ് എടത്തന. പതിനഞ്ച് ഏക്കറിലാണ് ഇവിടെ ഇത്തവണ തറവാടിന്റെ നേതൃത്വത്തില്‍ നെല്‍കൃഷിയിറക്കിയത്.
നെല്‍കൃഷി ഉപജീവനത്തിനുമപ്പുറം ഇവരുടെ ആചാരാനുഷ്ഠാനത്തിന്റെ ഭാഗമാണ്. ജീവിത സാഹചര്യങ്ങള്‍ മാറിയെങ്കിലും തലമുറകള്‍ കൈമാറി വന്ന ആചാരങ്ങള്‍ കോട്ടംതട്ടാതെ ഇന്നും തുടരുകയാണ് ഇവര്‍.