മുക്കം: പൊതുവിദ്യാഭ്യാസ സംരക്ഷണത്തിന് ഊന്നല്‍ നല്‍കി മുന്നോട്ടു പോകുന്ന സര്‍ക്കാര്‍ നയങ്ങള്‍ക്ക് മലയോര മേഖലയില്‍ വന്‍ സ്വീകാര്യത. പുതിയ അധ്യയന വര്‍ഷത്തില്‍ വിദ്യാലയങ്ങളില്‍ കുട്ടികളുടെ വര്‍ധനവുണ്ടായി.
മുക്കം നഗരസഭയിലും കാരശ്ശേരി, കൊടിയത്തൂര്‍ പഞ്ചായത്തുകളിലുമായി നൂറുകണക്കിന് വിദ്യാര്‍ഥികളാണ് വര്‍ധിച്ചത്.
പന്നിക്കോട് എ.യു.പി സ്‌കൂള്‍, പന്നിക്കോട് ജി.എല്‍.പി സ്‌കൂള്‍, ചെറുവാടി ഹയര്‍ സെക്കന്‍ഡറി സ്‌കൂള്‍, സൗത്ത് കൊടിയത്തൂര്‍ യു.പി സ്‌കൂള്‍, കൊടിയത്തൂര്‍ ജി.എം.യു.പി സ്‌കൂള്‍, കാരമൂല ഗവ. എല്‍.പി സ്‌കൂള്‍, ചേന്ദമംഗല്ലൂര്‍ ഗവ. യു.പി സ്‌കൂള്‍ എന്നിവിടങ്ങളില്‍ കുട്ടികളുടെ എണ്ണത്തില്‍ വര്‍ധനവ് വന്നിട്ടുണ്ട്. പന്നിക്കോട് എ.യു.പി സ്‌കൂളില്‍ കഴിഞ്ഞ വര്‍ഷം 240 ആയിരുന്നത് ഇത്തവണ 262 ആയി ഉയര്‍ന്നു. അഞ്ചാം ക്ലാസില്‍ 72 കുട്ടികളായിരുന്നത് 100 ആയും വര്‍ധിച്ചു. പന്നിക്കോട് ഗവ. എല്‍.പി യില്‍ ഒന്നാം ക്ലാസില്‍ 45 കുട്ടികള്‍ പ്രവേശനം നേടി. കഴിഞ്ഞ വര്‍ഷം ഇത് 42 ആയിരുന്നു. സൗത്ത് കൊടിയത്തൂര്‍ എ.യു.പി സ്‌കൂളിലെ വിദ്യാര്‍ഥികളുടെ എണ്ണം 661ല്‍ നിന്ന് 672 ആയി വധിച്ചു. ഒന്നാം ക്ലാസില്‍ 52ല്‍ നിന്ന് 74 ആയാണ് വര്‍ധിച്ചത്.
കൊടിയത്തൂര്‍ ജി.എം.യു.പി സ്‌കൂളിലെ വിദ്യാര്‍ഥികളുടെ എണ്ണം 765ല്‍ നിന്ന് 770 ആയും വര്‍ധിച്ചു. ചെറുവാടി ഹയര്‍ സെക്കന്‍ഡറിയില്‍ ഒന്നാം ക്ലാസിലേക്ക് കഴിഞ്ഞ തവണ 52 പുതിയ അഡ്മിഷനായിരുന്നത് ഇത്തവണ 75 ആയി വര്‍ധിച്ചു.ചേന്ദമംഗല്ലൂര്‍ ഗവ. യു.പി സ്‌കൂളില്‍ കഴിഞ്ഞവര്‍ഷം 1166 വിദ്യാര്‍ഥികളായിരുന്നു. ഇത്തവണ 1230 ആയി ഉയര്‍ന്നു. ഒന്നാം ക്ലാസില്‍ കഴിഞ്ഞ വര്‍ഷത്തിനേക്കാളും 24 കുട്ടികള്‍ പ്രവേശനം നേടി.
മണാശേരി ഗവ. യു.പി സ്‌കൂളില്‍ കഴിഞ്ഞവര്‍ഷത്തെ 671 ഇത്തവണ 705 ആയി വര്‍ധിച്ചതോടൊപ്പം ഒന്നാം ക്ലാസില്‍ 32ല്‍ നിന്ന് 116 ആയും ഉയര്‍ന്നു. കാരശ്ശേരി എച്ച്.എന്‍.സി.കെ.യു.പി സ്‌കൂളില്‍ 311 വിദ്യാര്‍ഥികളുള്ളത് 321 ആയും ഒന്നാം ക്ലാസില്‍ 32ല്‍ നിന്ന് 34 ആയും വര്‍ധിച്ചു.
കക്കാട് ഗവ. എല്‍.പി സ്‌കൂളില്‍ 130ല്‍ നിന്ന് 139 ലേക്ക് ഉയര്‍ന്നു. ആനയാംകുന്ന് ഗവ. എല്‍.പി സ്‌കൂളില്‍ 268 വിദ്യാര്‍ഥികളില്‍ നിന്ന് 279 ആയി ഉയര്‍ന്നതോടൊപ്പം ഒന്നാം ക്ലാസില്‍ 62 പേര്‍ പ്രവേശനം നേടുകയും ചെയ്തു. ആനയാംകുന്ന് ഹയര്‍ സെക്കന്‍ഡറിയില്‍ യു.പി, ഹൈസ്‌കൂള്‍ വിഭാഗങ്ങളിലായി 656 വിദ്യാര്‍ഥികളുണ്ടായിരുന്നത് ഇത്തവണ 724 ആയി വര്‍ധിച്ച് ഡിവിഷനുകള്‍ കൂടി. കുമാരനെല്ലുര്‍ ഗവ. എല്‍.പി സ്‌കൂളില്‍ 248ല്‍ നിന്ന് 263 ആയി വര്‍ധിച്ചതോടൊപ്പം ഒന്നാം ക്ലാസില്‍ 71 കുട്ടികള്‍ പ്രവേശനം നേടി.
പൊതുവിദ്യാലയങ്ങളുടെ അടിസ്ഥാന സൗകര്യങ്ങള്‍ മെച്ചപ്പെട്ടതും അധ്യാപകരുടെയും പി.ടി.എ കമ്മിറ്റികളുടെയും രക്ഷിതാക്കളുടെയും പൂര്‍വവിദ്യാര്‍ഥികളുടെയും സംയുക്തമായ പ്രവര്‍ത്തനങ്ങളാണ് ഈ വര്‍ധനവിന് കാരണമെന്ന് അധ്യാപകര്‍ പറഞ്ഞു.