കോഴിക്കോട്: കടലാസ് വില ഭീമമായി വര്‍ധിക്കുന്നതും മേഖലയിലെ മറ്റു പ്രതിസന്ധികളും തരണം ചെയ്യാന്‍ പ്രസുകള്‍ അച്ചടിനിരക്കില്‍ വലിയ തോതില്‍ വര്‍ധന വരുത്തുന്നു. നവംബര്‍ മുതല്‍ 25 ശതമാനം വര്‍ധനയാണ് ഈ മേഖലയില്‍ വരുത്തുന്നത്. കിലോയ്ക്ക് 60 രൂപയുണ്ടായിരുന്ന കടലാസിന്റെ വില ഇപ്പോള്‍ 75 ആണ്.
ദീര്‍ഘനാളായി അച്ചടിജോലികള്‍ കരാര്‍ എടുത്തിരിക്കുന്ന സ്ഥാപനങ്ങള്‍ നഷ്ടത്തിലാണു പ്രവൃത്തിക്കുന്നതെന്നും ഇവ അടച്ചുപൂട്ടാന്‍ പോവുകയാണെന്നും ബന്ധപ്പെട്ടവര്‍ പറയുന്നു. ഇതിനുപുറമെ പ്രളയദുരന്തവും മേഖലയെ ബാധിച്ചിട്ടുണ്ട്. സംസ്ഥാനത്ത് 60 ഓളെ പ്രസുകള്‍ ദുരിതത്തില്‍പെട്ടിട്ടുണ്ട്. 400 കോടിയോളം നഷ്ടം മേഖലയ്ക്ക് പ്രളയം കാരണം സംഭവിച്ചിട്ടുണ്ട്.
കടലാസിനു പുറമെ മഷി, കെമിക്കല്‍സ് എന്നിവയ്ക്കും വന്‍ തോതില്‍ വില വര്‍ധിച്ചിരിക്കുകയാണ്. അയല്‍സംസ്ഥാനങ്ങളില്‍ നിന്നാണു കടലാസ് കേരളത്തിലേക്കെത്തുന്നത്. കേരളത്തില്‍ സര്‍ക്കാര്‍ ഉള്‍പ്പെടെ അച്ചടിക്കായി അയല്‍സംസ്ഥാനങ്ങളെയാണ് ആശ്രയിക്കുന്നത്.
കേരളത്തിലെ കടലാസ് നിര്‍മാണക്കമ്പനികളെല്ലാം അടച്ചുപൂട്ടിയതും പ്രസുകള്‍ക്ക് നേരത്തെ കിട്ടിക്കൊണ്ടിരിക്കുന്ന പേപ്പര്‍ ക്വാട്ട നിര്‍ത്തലാക്കിയതും ഒഫിസുകളും മറ്റും പേപ്പര്‍രഹിതമാകുന്നതും ഈ വ്യവസായ മേഖലയെ പ്രതിസന്ധിയിലാക്കിയിരിക്കുകയാണ്.
വന്‍ വില നല്‍കിയാലും കടലാസ് ആവശ്യത്തിനു ലഭിക്കുന്നില്ലെന്ന പരാതിയും മേഖലയുമായി ബന്ധപ്പെട്ടവര്‍ പറയുന്നു. ജി.എസ്.ടിയിലെ അപാകതകളും തങ്ങള്‍ക്ക് ദുരിതം തീര്‍ക്കുകയാണ്.
അച്ചടിമേഖലയിലെ പ്രതിസന്ധികള്‍ പരിഹരിക്കാന്‍ കേന്ദ്ര, സംസ്ഥാന സര്‍ക്കാരുകള്‍ ഇടപെടണമെന്നാണ് പ്രിന്റേഴ്‌സ് അസോസിയേഷന്റെ ആവശ്യം. നവംബര്‍ 11ന് കേരള പ്രിന്റേഴ്‌സ് അസോസിയേഷന്‍ സംസ്ഥാന കമ്മിറ്റി തിരുവനന്തപുരത്ത് ചേര്‍ന്ന് സമരപരിപാടികള്‍ക്കു രൂപം നല്‍കുന്നുണ്ട്.