ലണ്ടന്‍: അടുത്തവര്‍ഷം നടക്കാനിരിക്കുന്ന യൂറോ കപ്പിനായുള്ള യോഗ്യതാ മത്സരത്തില്‍ സ്‌പെയിന്‍, ഇറ്റലി ടീമുകള്‍ക്ക് ജയം. അര്‍മേനിയ, റുമേനിയ, സ്വിറ്റ്‌സര്‍ലന്‍ഡ് ടീമുകളും ജയിച്ചുകയറി. ഫറോയി ഐലന്റിനെ 4-0 എന്ന സ്‌കോറിനാണ് സ്‌പെയിന്‍ കീഴടക്കിയത്. അതേസമയം ഇറ്റലി ഫിന്‍ലന്‍ഡിനെതിരേ 2-1ന് തടിതപ്പുകയായിരുന്നു. ഗ്രൂപ്പ് ഡിയില്‍ സ്‌പെയിനാണ് ഒന്നാമത്. ഗ്രൂപ്പ് ജെയില്‍ ഇറ്റലിയും ഒന്നാം സ്ഥാനത്താണ്.
റോഡ്രിഗോ (13,50), പകരക്കാരനായിറങ്ങിയ പാകോ അല്‍കാസര്‍ (89,90+3) എന്നിവരുടെ ഇരട്ടഗോളുകളാണ് സ്‌പെയിനിന് വന്‍ വിജയം സമ്മാനിച്ചത്. പന്തടക്കത്തിലും ഗോള്‍ശ്രമത്തിലും സ്‌പെയിന്‍ തന്നെയായിരുന്നു മുന്നില്‍.
ഫിന്‍ലന്‍ഡിനെതിരേ ഇറ്റലിക്ക് പ്രതീക്ഷിച്ച പ്രകടനം പുറത്തെടുക്കാനായില്ല. ഇമ്മോബില്‍ (50) ജോര്‍ഗിന്യോ(79) എന്നിവരാണ് ഗോള്‍ നേടിയത്. ഫിന്‍ലന്‍ഡിന് അനുകൂലമായി ലഭിച്ച പെനാല്‍റ്റി ഗോളാക്കി ടീമു പുക്കി (72) ആശ്വാസഗോള്‍ നേടി. മുന്നേറ്റനിരയുടെ വീഴ്ചയാണ് ഇറ്റലിയെ കൂടുതല്‍ ഗോളുകള്‍ നേടുന്നതില്‍നിന്ന് അകറ്റിയത്. സ്വീഡന്‍- നോര്‍വേ മത്സരം സമനിലയില്‍ സമാപിച്ചു.