കായംകുളം: എക്‌സൈസ് ഉദ്യോഗസ്ഥര്‍ ചമഞ്ഞു പണം തട്ടിയ മൂന്ന് പേര്‍ അറസ്റ്റില്‍.
തൃശ്ശൂര്‍ സ്വദേശികളായ മണികണ്ഠന്‍ (49), ഷഹീര്‍ (24) കള്ളിക്കാട് സ്വദേശി ഹരീഷ്‌കുമാര്‍ (31) എന്നിവരെയാണ് കനകക്കുന്ന് പൊലിസ് ഇന്നലെ തൃശ്ശൂരില്‍ നിന്നാണ് ഇവരെ അറസ്റ്റ് ചെയ്തത്.
ഒക്ടോബര്‍ 23ന് ആണ് കേസിനാസ്പദമായ സംഭവം നടക്കുന്നത്. മുതുകുളം തെക്ക് മണ്ണാരേത്ത് സജീവന്റെ വീട്ടില്‍ ആണ് തട്ടിപ്പ് നടന്നത്. ഹരിപ്പാട് റേഞ്ചില്‍ നിന്നുള്ള എക്‌സൈസ് ഉദ്യോഗസ്ഥരാണെന്ന് പറഞ്ഞ് രാവിലെ ഏഴ് മണിയോടെ മൂവ്വര്‍ സംഘം വീട്ടില്‍ എത്തുകയായിരുന്നു. തുടര്‍ന്ന് ഇവിടെ നിന്നും 11000 രൂപയും, 12000 രൂപ വില വരുന്ന മൊബൈല്‍ ഫോണും പിടിച്ചുവാങ്ങി. ഇത് അടുത്ത ദിവസം ഹരിപ്പാട് റേഞ്ച് ഓഫിസില്‍ എത്തി മടക്കിവാങ്ങാനും നിര്‍ദേശിച്ചു. പിന്നീട് ജീപ്പ് റെയ്ഡിന് പോയിരിക്കുന്നു എന്ന് പറഞ്ഞു ഓട്ടോയില്‍ ആണ് ഇവിടെ നിന്നും ഇവര്‍ പോയത്. ഓട്ടോയില്‍ കായംകുളം ഒ എന്‍.കെ ജങ്ഷനില്‍ ഇറങ്ങിയ ഇവരുടെ ദൃശ്യങ്ങള്‍ സമീപത്തെ കടയിലെ സി.സി.ടി.വി യില്‍ നിന്നും പൊലിസിന് ലഭിച്ചിരുന്നു. കൂടാതെ സജീവന്റെ വീട് തിരക്കി ഹരീഷ് ഒരു സുഹൃത്തിനെ വിളിച്ചിരുന്നു. ഇതനുസരിച്ച് സൈബര്‍ സെല്ലിന്റെ സഹായത്തോടെയാണ് പ്രതികളെ കണ്ടെത്തിയത്. പ്രതികള്‍ അന്ന് തന്നെ ട്രെയിനില്‍ തൃശൂരിലേക്ക് പോയിരുന്നു. സംശയം തോന്നിയ സജീവന്‍ അന്ന് വൈകുന്നേരമാണ് പൊലിസില്‍ പരാതി നല്‍കിയത്. ഹരീഷ് വിവാഹം കഴിച്ചിരിക്കുന്നത് തൃശൂരില്‍ നിന്നും ആണ്. അങ്ങനെയാണ് ഇവര്‍ പരിചയക്കാര്‍ ആയത്. ഹരീഷിനെയും മണികണ്ഠനേയും മണ്ണുത്തിയില്‍ നിന്നും ഷെഹീറിനെ എരുമപെട്ടയിലെ ഇയാളുടെ വീട്ടില്‍ നിന്നും ആണ് പിടികൂടിയത്. ഹരീഷിന്റെ പേരില്‍ തൃക്കുന്നപ്പുഴ സ്റ്റേഷനില്‍ മൂന്നോളം മോഷണ കേസുകള്‍ നിലവില്‍ ഉണ്ട്. ഷെഹീറിന്റെ പേരില്‍ രണ്ട് കിലോ കഞ്ചാവുമായി എലവക്കോട് വച്ച് റെയില്‍വേ പൊലിസ് പിടിച്ച കേസും ഉണ്ട്. പ്രതികളെ റിമാന്‍ഡ് ചെയ്തു.