ദുബൈ: പ്രായപൂര്‍ത്തിയാകാത്ത ബ്രിട്ടീഷ് പെണ്‍കുട്ടിയുമായി ശാരീരിക ബന്ധത്തില്‍ ഏര്‍പ്പെട്ടതിന് ദുബൈയില്‍ തടവുശിക്ഷ അനുഭവിച്ചുകൊണ്ടിരുന്ന ബ്രിട്ടീഷ് കൗമാരക്കാരന്‍ മാര്‍ക്കസ് ഫക്കാനയെ വിട്ടയച്ചു. ബലിപെരുന്നാളിനേട് അനുബന്ധിച്ച് യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് 985 തടവുകാര്‍ക്ക് മാപ്പ് നല്‍കിയിരുന്നു. ഈ പട്ടികയില്‍ മാര്‍ക്കസ് ഫക്കാനയും ഉള്‍പ്പെട്ടിരുന്നു. ഇതിനെ തുടര്‍ന്നാണ് ഫക്കാനയെ മോചിപ്പിച്ചതെന്ന് ദുബൈ സര്‍ക്കാരിന്റെ മീഡിയഓഫീസ് അറിയിച്ചു.

ALSO READ: റാസല്‍ഖൈമയില്‍ വിമാനാപകടത്തില്‍ മരിച്ച ഇന്ത്യന്‍ ഡോക്ടര്‍ക്ക് ആദരമായി ഉഗാണ്ടയില്‍ രണ്ട് പള്ളികള്‍ നിര്‍മിക്കുന്നു

ബിബിസി റിപ്പോര്‍ട്ട് അനുസരിച്ച്, വടക്കന്‍ ലണ്ടനിലെ ടോട്ടന്‍ഹാമില്‍ നിന്നുള്ള 19 കാരനായ ഫക്കാനയെ ഡിസംബറില്‍ യുഎഇയില്‍ അവധിക്കാലം ആഘോഷിക്കുന്നതിനിടെ പ്രായപൂര്‍ത്തിയാകാത്ത ബ്രിട്ടീഷ് പെണ്‍കുട്ടിയുമായുള്ള ബന്ധത്തിന്റെ പേരില്‍ ഒരു വര്‍ഷത്തെ തടവിന് ശിക്ഷിച്ചിരുന്നു. പെണ്‍കുട്ടിക്ക് 17 വയസ്സ് മാത്രമേ ഉള്ളൂ എന്നാണ് റിപ്പോര്‍ട്ട്. യുഎഇയില്‍ വിവാഹം കഴിക്കാനുള്ള പ്രായം 18 വയസ്സാണ്.

'ഫക്കാന ഈദ് മാപ്പില്‍ മോചിതനായി,' യുകെയിലെ വിദേശ, കോമണ്‍വെല്‍ത്ത്, വികസന ഓഫീസിന്റെ (എഫ്‌സിഡിഒ) വക്താവിനെ ഉദ്ധരിച്ച് ബിബിസി പറഞ്ഞു: 

'മാധ്യമ ശ്രദ്ധയില്ലാതെ യുകെയിലേക്ക് മടങ്ങാനും കുടുംബത്തെ കാണാനും അദ്ദേഹം ആഗ്രഹിച്ചിരുന്നുവെന്ന് ഞങ്ങള്‍ മനസ്സിലാക്കുന്നു. ഞങ്ങള്‍ അദ്ദേഹത്തെ പിന്തുണയ്ക്കുകയും അവരുമായി ബന്ധപ്പെടുകയും ചെയ്തു,' എഫ്‌സിഡിഒ കൂട്ടിച്ചേര്‍ത്തു.

യുഎഇ ഭരണാധികാരികള്‍ കഴിഞ്ഞ മാസം നൂറുകണക്കിന് തടവുകാര്‍ക്കാണ് മാപ്പ് നല്‍കിയത്. വിവിധ കേസുകളില്‍ ശിക്ഷിക്കപ്പെട്ട 963 തടവുകാരെ ശിക്ഷാ, തിരുത്തല്‍ കേന്ദ്രങ്ങളില്‍ നിന്ന് മോചിപ്പിക്കാന്‍ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ ഉത്തരവിട്ടിരുന്നു.

ദുബൈയിലെ ജയിലുകളില്‍ നിന്ന് 985 വ്യത്യസ്ത രാജ്യക്കാരായ തടവുകാരെ മോചിപ്പിക്കാന്‍ ഷെയ്ഖ് മുഹമ്മദും ഉത്തരവിട്ടിരുന്നു. ശിക്ഷാകാലയളവിലെ നല്ല നടപ്പ് പരിഗണിച്ചാണ് തടവുകാര്‍ക്ക് രാജകീയ മാപ്പിന് അര്‍ഹതയുണ്ടെന്ന് കണ്ടെത്തിയത്.

ALSO READ: ക്രിപ്‌റ്റോ നിക്ഷേപകര്‍ക്ക് ഗോള്‍ഡന്‍ വിസ നല്‍കില്ലെന്ന് യുഎഇ; സമൂഹമാധ്യമങ്ങളില്‍ പ്രചരിക്കുന്നത് വ്യാജ വാര്‍ത്തയെന്ന് അധികൃതര്‍

ഈദുല്‍ ഫിത്തര്‍, ഈദുല്‍ അദ്ഹ, ദേശീയ ദിനം തുടങ്ങിയ പ്രധാന മതപരവും ദേശീയവുമായ അവസരങ്ങള്‍ക്ക് മുമ്പായി രാജ്യത്തെ ഭരണാധികാരികള്‍ പലപ്പോഴും തടവുകാര്‍ക്ക് മാപ്പ് നല്‍കാറുണ്ട്. ഈ പ്രവൃത്തികളെ കാരുണ്യ പ്രവൃത്തികളായും പുനരധിവാസത്തിനും സമൂഹത്തിലേക്കുള്ള പുനഃസംയോജനത്തിനുമുള്ള അവസരങ്ങളായും കാണുന്നു.

Authorities in Dubai have released a British teenager who was jailed in connection with a case involving an underage girl. The circumstances surrounding the case and the legal process have drawn international attention.