റിയാദ് : സഊദിയില്‍ വിവിധ ഭരണ വകുപ്പുകളില്‍ മാറ്റം വരുത്തി രാജാവ് സല്‍മാന്‍ ഇബ്‌നു അബ്ദുല്‍ അസീസ് ഉത്തരവിറക്കി. വിവിധ വകുപ്പ് തലവന്‍മാര്‍ക്ക് റിട്ടയര്‍മെന്റും സ്ഥാനകയറ്റവും നല്‍കുകയും ചെയ്തിട്ടുണ്ട്. ബ്യൂറോ ഓഫ് ഇന്‍വെസ്റ്റിഗേഷന്‍ ആന്റ് പബ്ലിക് പ്രോസിക്യൂഷന്റെ പേര് പബ്ലിക് പ്രോസിക്യൂഷന്‍ എന്നാക്കി മാറ്റുകയും. പബ്ലിക് പ്രോസിക്യൂഷന്‍ മേധാവി അറ്റോര്‍ണി ജനറല്‍ എന്ന പേരിലുമായിരിക്കും ഇനി അറിയപ്പെടുക.

രാജ്യത്തെ പുതിയ പൊതുസുരക്ഷാ വകുപ്പ് മേധാവിയായി സഊദ് ബിന്‍ അബ്ദുല്‍ അസീസ് ഹിലാലിനെ നിയമിച്ചു. മേജര്‍ ജനറല്‍ റാങ്കില്‍ നിന്ന് ജനറല്‍ റാങ്കിലേക്ക് സ്ഥാനക്കയറ്റം നല്‍കിയാണ് ഇദ്ദേഹത്തെ പൊലിസ് സേനയുടെ തലപ്പത്ത് നിയമിച്ചത്. പൊതുസുരക്ഷാ വകുപ്പ് മേധാവിയായിരുന്ന ജനറല്‍ ഉസ്മാന്‍ അല്‍മുഹ്‌റജിന് റിട്ടയര്‍മെന്റ് നല്‍കി.

നാഷണല്‍ ഗാര്‍ഡ് മന്ത്രാലയത്തിലെ ജനറല്‍ ഫൈസല്‍ ബിന്‍ അബ്ദുല്‍ അസീസ് ബിന്‍ ലബ്ദക്കും റിട്ടയര്‍മെന്റ് നല്‍കി ജനറല്‍ റാങ്കോടെ റോയല്‍ കോര്‍ട്ട് ഉപദേഷ്ടാവായി നിയമിച്ചു. ബ്യൂറോ ഓഫ് ഇന്‍വെസ്റ്റിഗേഷന്‍ ആന്റ് പബ്ലിക് പ്രോസിക്യൂഷന്‍ മേധാവി ശൈഖ് മുഹമ്മദ് അല്‍ഉറൈനിയെ പദവിയില്‍നിന്ന് നീക്കം ചെയ്തു.

ശൈഖ് സഊദ് ബിന്‍ അബ്ദുല്ല അല്‍മുഅജബിനെയാണ് പബ്ലിക് പ്രോസിക്യൂഷന്‍ അറ്റോര്‍ണി ജനറലായി നിയമിച്ചത്. മന്ത്രി റാങ്കോടെയാണ് നിയമം. കൂടാതെ, പബ്ലിക് പ്രോസിക്യൂഷന് സ്വതന്ത്ര ചുമതലയും നല്‍കിയിട്ടുണ്ട്.

ജനറല്‍ അതോറിറ്റി ഓഫ് സിവില്‍ ഏവിയേഷന്‍ പ്രസിഡന്റ് ആയി അബ്ദുല്‍ ഹകീം അല്‍തമീമിയെയും സക്കാത്ത്, നികുതി അതോറിറ്റി പ്രസിഡന്റ് ആയി സുഹൈല്‍ അബാനമിയെയും റോഡല്‍ കോര്‍ട്ട് ഡെപ്യൂട്ടി പ്രസിഡന്റ് ആയി ഉഖലാ ബിന്‍ അലി അല്‍ഉഖലായെയും നിയമിച്ചു. അല്‍ഖര്‍ജ് പ്രിന്‍സ് സത്താം യൂനിവേഴ്‌സിറ്റി ഡയറക്ടറായി ഡോ. അബ്ദുല്‍ അസീസ് ബിന്‍ അബ്ദുല്ല അല്‍ഹാമിദിനെ നിയമിച്ചു.

ഫഹദ് ബിന്‍ അബ്ദുല്ല അല്‍മുബാറക്കിനെയും തുര്‍ക്കി ബിന്‍ അബ്ദുല്‍ മുഹ്‌സിന്‍ ആലുശൈഖിനെയും ഡോ. ഹമദ് ബിന്‍ മുഹമ്മദ് ആലുശൈഖിനെയും മുസാഅദ് ബിന്‍ നാസിര്‍ അല്‍ബറാക്കിനെയും റോയല്‍ കോര്‍ട്ട് ഉപദേഷ്ടാക്കളായും തമീം ബിന്‍ അബ്ദുല്‍ അസീസ് അല്‍സാലിമിനെ രാജാവിന്റെ അസിസ്റ്റന്റ് പ്രൈവറ്റ് സെക്രട്ടറിയായും നിയമിച്ചു