കാക്കനാട്: നഗരസഭയുടെ നയണ്‍ സ്റ്റാര്‍ പദ്ധതിയില്‍പ്പെട്ട പഴങ്ങാട്ട് ടൂറിസം പദ്ധതി വിവാദത്തിലേക്ക്. സി.പി.എമ്മില്‍ ഭിന്നത രൂക്ഷമാകുന്നു. പദ്ധതി പ്രദേശത്തേക്കുള്ള വഴിയുടെ മറവില്‍ ഭൂവുടമക്ക് 1.20 ഏക്കര്‍ തീറെഴുതാന്‍ നീക്കം.
സി.പി.എം സ്റ്റിയറിങ് കമ്മിറ്റി തീരുമാന പ്രകാരം ശനിയാഴ്ച നടക്കുന്ന തൃക്കാക്കര നഗരസഭ കൗണ്‍സില്‍ യോഗത്തിലെ അജണ്ടയില്‍ ഉല്‍പ്പെടുത്താനാണ് തീരുമാനം. പഴങ്ങാട്ട് ചാല്‍ ടൂറിസം പദ്ധതി പ്രദേശത്തേക്ക് നിലവില്‍ വാഹനങ്ങള്‍ക്ക് സഞ്ചരിക്കാവുന്ന വഴിയില്ല.
സ്വകാര്യ വ്യക്തിയുടെ 40 സെന്റ് ഏറ്റെടുത്ത് വഴിയുണ്ടാക്കാനാണ് നഗരസഭ ആലോചിക്കുന്നത്. ഒന്‍പത് ഏക്കറുള്ള പഴങ്ങാട്ട് ചാല്‍ ടൂറിസം പദ്ധതി പ്രദേശത്ത് നിന്നും 1.20 ഏക്കര്‍ വീട്ട് നല്‍കി പകരം വഴിക്കായി ഭൂവുടമയുടെ 40 സെന്റില്‍ വഴി നിര്‍മിക്കാനാണ് ആലോചിക്കുന്നത്.
ഭൂവുടമയുടെ ഒരു സെന്റിന് പകരം പദ്ധതി പ്രദേശത്ത് നിന്നും മൂന്ന് സെന്റ് വീട്ടു നല്‍കുന്നതിനായി ചരട് വലിച്ചത് സിപിഎം പ്രദേശിക നേതാക്കളായിരുന്നു. ആദ്യം ഒന്നിന് പകരം അഞ്ച് സെന്റ് നല്‍കാനായിരുന്നു പ്രദേശിക നേതാക്കള്‍ നിര്‍ദേശം മുന്നോട്ട് വെച്ചത്. ഈ നിര്‍ദേശത്തിനെതിരേ പാര്‍ട്ടി അണികളിലും നഗരസഭ കൗണ്‍സിലര്‍മാക്കിടയിലും വന്‍ പ്രതിഷേധത്തിന് ഇടയാക്കിയതിനെ തുടര്‍ന്ന് ഒന്നിന് പകരം മൂന്നാക്കി ചുരുക്കുകയായിരുന്നു.
ഭൂവുടമക്ക് നഗരസഭയുടെ ടൂറിസം പദ്ധതി പ്രദേശത്തെ സ്ഥലം തീറെഴുതാനുള്ള നീക്കത്തിനെതിരെ സി.പി.എം വിമത കൗണ്‍സിലര്‍ രംഗത്തെത്തിയതോടെ രണ്ട് മാസം മുമ്പ് ഉപേക്ഷിച്ച തീരുമാനമാണ് വീണ്ടും സജീവമായിരിക്കുന്നത്.
ലാന്‍ഡ് അക്വിസേഷന്‍ നിയമ പ്രകാരം ടൂറിസം പദ്ധതി പ്രദേശത്തേക്ക് ഭൂവുടമയുടെ സ്ഥലം ഏറ്റെടുക്കണമെന്നായിരുന്നു കൗണ്‍സിലര്‍മാരില്‍ ഭൂരിപക്ഷത്തിന്റെയും നിര്‍ദേശം. ഇക്കാര്യം സജീവമായി പരിഗണിക്കാമെന്ന് നഗരസഭ ചെയര്‍പേഴ്‌സണ്‍ ഉറപ്പു നല്‍കിയിരുന്നു. എന്നാല്‍ ഇത് മറികടന്നാണ് പദ്ധതി പ്രദേശത്തെ സ്ഥലം ഭൂവുടമക്ക് നല്‍കാന്‍ ആലോചിക്കുന്നത്.