കാസര്‍കോട്: കാറും പണവുമായി മുങ്ങിയ യുവാവിനെ പൊലിസ് അറസ്റ്റ് ചെയ്തു. വിദ്യാനഗര്‍ ഐ.ടി റോഡിലെ കാലിക്കറ്റ് ഹൗസിലെ മുഹമ്മദ് ശൈഷാദ് ബാജിസ്‌ന സുഹൈലാണ്(32) പൊലിസിന്റെ പിടിയിലായത്.
നഗരത്തിലെ എമിരറ്റസ് റീജന്‍സി ലോഡ്ജില്‍ 2016ല്‍ നവംബര്‍, ഡിസംബര്‍ മാസങ്ങളില്‍ ഇയാള്‍ താമസിച്ചിരുന്നു. ഇതിനിടെ ഹോട്ടലുടമ ആലംപാടിയിലെ ഹമീദലിയുമായി പരിചയത്തിലാവുകയും ചെയ്തു. തുടര്‍ന്ന് മംഗളൂരുവില്‍ കോഫിഷോപ്പ് തുറക്കാനെന്നു പറഞ്ഞ് പാര്‍ട്ണര്‍ ആക്കാമെന്ന വാഗ്ദാനം നല്‍കി മൂന്നു ലക്ഷം രൂപ ഇദ്ദേഹത്തില്‍നിന്നു സ്വന്തമാക്കുകയായിരുന്നു.
തുടര്‍ന്ന് ഹമീദിന്റെ തന്നെ ഇന്നോവ കാറുമായാണ് ഇയാള്‍ കടന്നുകളഞ്ഞത്. ഹോട്ടലില്‍ താമസിച്ച വാടകയിനത്തില്‍ 90,000 രൂപയും ഇയാള്‍ നല്‍കാനുള്ളതായി പരാതിയില്‍ പറയുന്നു.
കുറ്റിപ്പുറത്ത് വച്ചാണ് കാസര്‍കോട് എസ്.ഐയുടെ നേതൃത്വത്തിലുള്ള പൊലിസ് സംഘം സുഹൈലിനെ പിടികൂടിയത്. പ്രതിയെ കോടതിയില്‍ ഹാജരാക്കി. കവര്‍ന്ന കാര്‍ ഇയാളുടെ സുഹൃത്ത് ഉബൈദുല്ലയുടെ കൈവശമുണ്ടെന്ന് പ്രതി പൊലിസില്‍ മൊഴിനല്‍കിയിട്ടുണ്ട്.