കൊല്‍ക്കത്ത: കന്നുകാലി മോഷണം ആരോപിച്ച് മൂന്ന് യുവാക്കളെ പ.ബംഗാളില്‍ ജനക്കൂട്ടം തല്ലിക്കൊന്നു. മുഹമ്മദ് നസിറുല്‍ ഹക്ക്(30), മുഹമ്മദ് നസീറുദീന്‍(32), മുഹമ്ദ നാസിര്‍(33) എന്നിവരാണ് മരിച്ചത്.
ഉത്തര ദിനാജ്പൂര്‍ ജില്ലയില്‍ സോനാര്‍പൂര്‍ ഗ്രാമ പഞ്ചായത്ത് പരിധിയിലാണ് സംഭവം. പത്തംഗ സംഘം പ്രദേശത്ത് എത്തിയെന്നും ഇവരുടെ ലക്ഷ്യം കന്നുകാലി മോഷണമാണെന്നും ആരോപിച്ചായിരുന്നു ഗ്രാമീണരുടെ ആക്രമണം. സംഭവത്തിനുപിന്നില്‍ വര്‍ഗീയ ചേരിതിരിവുണ്ടായിട്ടില്ലെന്ന് പൊലിസ് സൂപ്രണ്ട് അമിത്കുമാര്‍ ഭരത് റാത്തോഡ് പറഞ്ഞു. ഗ്രാമത്തിലെത്തിയവരില്‍ മൂന്നുപേരെയാണ് ജനക്കൂട്ടം പിടികൂടിയത്. മര്‍ദനമേറ്റ് സംഭവ സ്ഥലത്തു തന്നെ ഇവര്‍ മരിച്ചു. അക്രമവുമായി ബന്ധപ്പെട്ട് ആരേയും പിടികൂടിയിട്ടില്ലെന്ന് പൊലിസ് അറിയിച്ചു. അക്രമികളെ കണ്ടെത്താനായി പൊലിസ് തെരച്ചില്‍ തുടങ്ങിയിട്ടുണ്ട്. മരിച്ച മുഹമ്മദ് നസീറുല്‍ ഹക്കിന്റെ മാതാവ് മംമ്താജ് ബീവിയുടെ പരാതിയില്‍ പൊലിസ് കൊലപാതകത്തിന് കേസെടുത്തിട്ടുണ്ട്.