ലഖ്‌നോ: തെരഞ്ഞെടുപ്പ് അടുത്തപ്പോള്‍ രാമക്ഷേത്ര നിര്‍മാണ വിഷയം സജീവമാക്കാനുള്ള ശ്രമത്തിനിടെ ഹിന്ദുത്വ യുദ്ധത്തില്‍ മേല്‍ക്കൈ നേടാനും ബി.ജെ.പിയുടെ നീക്കം. ശിവസേനയുടെ ഉദ്ദവ് താക്കറെ അയോധ്യയില്‍ നടത്താനിരുന്ന റാലിക്ക് ഉത്തര്‍പ്രദേശിലെ ബി.ജെ.പിയുടെ യോഗി ആദിത്യനാഥ് സര്‍ക്കാര്‍ അനുമതി നിഷേധിച്ചു.

നവംബര്‍ 24 നാണ് പൊതുയോഗം സംഘടിപ്പിക്കാനും റാലി നടത്താനും ഉദ്ദവ് താക്കറെ തീരുമാനിച്ചിരുന്നത്. അയോധ്യയില്‍ ബാബരി മസ്ജിദ് നിലനിന്നിരുന്ന രാം കഥ പാര്‍ക്കിലാണ് ഉദ്ദവ് സമ്മേളനം നടത്താന്‍ തീരുമാനിച്ചത്. അതീവ പ്രശ്‌നമേഖലയാണിതെന്നു കാണിച്ചാണ് അനുമതി നിഷേധിച്ചത്.

ഇതിന് കുറേ ദൂരം അകലെയുള്ള ഗുലാബ് ബാരിയില്‍ പരിപാടി നടത്തണമെങ്കില്‍ ആയിക്കോളാമെന്നും മറുപടി നല്‍കി. എന്നാല്‍ അയോധ്യ സന്ദര്‍ശനത്തിന്റെ ഭാഗമായി സമ്മേളനം സംഘടിപ്പിക്കേണ്ടതില്ലെന്ന നിലപാടില്‍ എത്തിയിരിക്കുകയാണ് അദ്ദേഹമെന്നാണ് അറിയുന്നത്.